ރ.އަލިފުށިން ގެއްލިގެން ހޯދަމުން ދިޔަ މީހަކު މަރުވެފައިއޮތްވައި ފެނިއްޖެއެވެ. ފުލުހުން މައުލޫމާތު ދީފައިވާގޮތުން މަރުވެފައިވަނީ އުމުރުން 37 އަހަރުގެ އެރަށު ހުސްނޫވިލާ ފަރުހާދު މުހައްމަދެވެ.
އިއްޔެގެ ހުކުރުއިރުއްސުރެން ޚަބަރެއް ވެފައިނުވާ ފަރުހާދު ގެއްލިފައިވާ ކަމަށް ނިންމައި ފުލުހުންނަށް ރިޕޯޓު ކޮށްފައިވަނީ މިއަދު މެންދުރު 1:30 އެހާކަށްހާއިރެވެ. ފުލުހުންނަށް ރިޕޯޓުކުރުމާއެކު އެރަށު އާއްމު ރައްޔިތުންނާ ފުލުހުންނާ ގުޅިގެން ކުރި މަސައްކަތުން ފަރުހާދު މަރުވެފައި އޮތްވާ ފެނިފައިވަނީ އޭގެ ގަޑިއިރެއްހާއިރު ފަހުންނެވެ.
އޭނާ ފެނިފައިވަނީ އެރަށު އިރުމަތީ ގޮނޑުދޮށުން އާންމުންގެ ބަޔަކަށް ކަމަށްވެސް ފުލުހުންގެ ވަނީ މައުލޫމާތު ދީފައެވެ. އެހެންނަމަވެސް ފަރުހާދު މަރުވެފައިވަނީ ކިހިނެތް ކަމެއް އަދި މަރުވެފައިއޮތްވާ ފެނުނުއިރު އޮތް ގޮތެއްވެސް ފުލުހުން ހާމަކޮށްފައެއްނުވެއެވެ.
މިމައްސަލަ މިހާރު ފުލުހުން ދަނީ ތަހުގީގު ކުރަމުންކަމަށާއި ވީހާވެސް އަވަހަކަށް ނޫސްވެރިންނަށް މައުލޫމާތު ހިއްސާކުރާނެ ކަމަށް ފުލުހުންގެ މީޑިއާ އޮފިޝަލްވަނީ ވިދާޅުވެފައެވެ.