އިނގިރޭސި ޕްރިމިއާ ލީގު ކާމިޔާބުކުރި ލެސްޓާ ސިޓީގެ ޖޭމީ ވާޑީއަށް ޕްރިމިއާ ލީގުގެ ފަރާތުން ދޭ ސީޒަނުގެ މޮޅު ކުޅުންތެރިޔާގެ މަގާމު މިއަދު އަރުވައިފިއެވެ.
މިސީޒަނުގައި އާދަޔާހިލާފު މޮޅު ކުޅުމެއް ވާޑީގެ އިތުރުން އޭނާގެ މުޅި ޓީމުވެސް ދައްކާފައިވާއިރު ވާޑީ ވަނީ އެފް ޑަބްލިއު އޭ އިން ދޭ އަހަރުގެ މޮޅު ކުޅުންތެރިޔާގެ އެވޯޑު ގެ އިތުރުން ޕްރިމިއާ ލީގު ސީޒަނުގެ އެންމެ މޮޅު އެގާރައިގައިވެސް ހިމެނިފައެވެ. އަދި މީގެ އިތުރުން ލެސްޓާ ސިޓީގެ މޮޅު ކުޅުންތެރިޔާގެ އެވޯޑުވެސް މިސީޒަނުގައި ލިބިފައިވަނީ އޭނާއަށެވެ.
24 ގޯލު ލެސްޓާ އަށް މިސީޒަނުގައި ވާޑީ ޖަހާދީފައިވާއިރު އޭނާ ވަނީ ޖެހިޖެހިގެން އެންމެ ގިނަ މެޗުގައި ގޯލު ޖެހި ކުޅުންތެރިޔާގެ ރެކޯޑުވެސް ސީޒަނުގެ ކުރީކޮޅުގައި އާކޮށްފައެވެ.
އިނގިރޭސި ވިލާތުގެ ޒުވާން ފޯވާޑް ވަނީ އޭނާ މިސީޒަނުގައި ދެއްކި މޮޅު ކުޅުމުގެ ސަބަބުން އިނގިރޭސި ގައުމީ ފުޓުބޯޅަ ޓީމަށްވެސް ނަގާފައެވެ. ޖޫން މަހުގައި އޮންނަ ޔޫރޯ މުބާރާތަށް އިނގިރޭސިވިލާތުން ހޮވާ ޓީމަށް ވާޑީ ހޮވޭނެ ކަމުގެ ވަރަށް ބޮޑު ނިޝާންތަކެއް މިހާރުވަނީ ފާޅުވެފައެވެ. އިނގިރޭސި ކޯޗު ރޮއި ހޮޑްސަން ވާޑީ އަށް ތައުރީފުކޮށް ބުނެފައިވާ ބަސްތައް މީގެ ހެއްކަކަށް ފުދެއެވެ.
ސީޒަނުގެ މޮޅު ކުޅުންތެރިޔާގެ މަގާމު ލިބުނީތީ ވަރަށް އުފާވެފައިވާ ކަމަށާއި އަދި އެހާމެ ފަހުރުވެރި ޝަރަފެއް ލިބުނީތީ ބަޔާން ކުރަން ދަތި އިހުސާސުތަކެއް ވާކަމަށް ވާޑީ ވަނީ ޕްރިމިއާ ލީގަށް އިންޓަވިއު ދީފަައެވެ. "ކުޑައިރު ނަމޫނާއަކަށް ބެލި ކުޅުންތެރިން ވަނީ މިއެވޯޑު ހާސިލުކޮށްފަ. މިއަދު އަހަންނަށް މިއެވޯޑު ލިބުނީމަ އިންތިހާ އަށް އުފާވޭ އަދި ފަހުރުވެރިވެސްވޭ" ވާޑީގެ އިންޓަވިއުގައި ބުނެފައިވެއެވެ.