އައްޑޫ ސިޓީގެ ކުންފުންޏަކުން އިއްޔެ ވަގަށް ނަގާފައިވާ ތިޖޫރީތަކެއް އެކުންފުނީގެ އޮފީސް ހުންނަ ގޯތިތެރެއާއި އޮފީސް ޖެހިގެން ހުންނަ ފަޅުގޭތެރެއަށް އެއްލާލާފައިވަނިކޮށް ފުލުހުން ހޯދައިފިއެވެ.
ފުލުހުން މައުލޫމާތު ދީފައިވާގޮތުން ވަގަށް ނަގާފައިވަނީ އައްޑޫ ކޮންސްޓްރަކްޝަން މަސައްކަތް ކުރާ ކުންފުންޏެއްގެ ތިޖޫރީތަކެކެވެ. އަދި ނަގާފައިވަނީ އެއޮފީހުގައި ހުރި 2 ތިޖޫރީއެވެ. އެއް ތިޖޫރީ ކުންފުނީގެ އޮފީސް ހުންނަ އިމާރާތް ތެރެއިން ފުލުހުން ހޯދާފައިވާއިރު ދެވަނަ ތިޖޫރީ ފެނިފައިވަނީ އޮފީސް އިމާރާތް ކައިރީގައި ހުރި ފަޅުގޭތެރެއަށް އެއްލާލާފައިވަނިކޮށެވެ.
އިއްޔެގެ 5:50 އެހާކަށްހާއިރު މިކުންފުނިން ތިޖޫރީތަކެއް ގެއްލިގެން މައްސަލަ ހުށައަޅާފައިވާ ކަމަށާއި ހިތަދޫ ޕޮލިސް ސްޓޭޝަނުގައި ތިބި ފުލުހުން އެހާހިސާބުން ތިޖޫރީތައް ހޯދުމުގެ މަސައްކަތް ފަށާފައިވާކަމަށް ފުލުހުން މައުލޫމާތުދިނެވެ.
މިމައްސަލާގައި އެއްވެސް މީހަކު ހައްޔަރުކޮށްފައިވާކަމަށް ފުލުހުން މައުލޫމާތު ދީފައިނުވެއެވެ. އަދި ވަގަށް ނަގާފައިވަނީ ކޮން ކުންފުންޏަކުން ކަމަށްވެސް ފުލުހުން ހާމަކޮށްފައިނުވެއެވެ. މިމައްސަލަ މިހާރު ދަނީ އިތުރަށް ތަހުގީގު ކުރަމުން ކަމަށް ފުލުހުން ވަނީ މައުލޫމާތުދީފައެވެ.