މާކިއުރީ އެޗްއެފްއޭ އައިލެންޑް ފުޓްސަލް މުބާރާތުގެ ފައިނަލުގައި އެންމެ ފަހުގެ ޗެމްޕިއަން ތިމަރަފުށި ބަލިކޮށް ހިތާދޫ ހޯދައިފިއެވެ. މިއަދު ހަވީރު ކުޅުނު މިމުބާރާތުގެ ފައިނަލުގައި ހިތާދޫ ތިމަރަފުށީގެ މައްޗަށް ކުރިހޯދާފައިވަނީ 0-1 ގެ ނަތީޖާއިންނެވެ.
މެޗުގެ ފުރަތަމަ ހާފުގެ 28 ވަނަ މިނެޓުގައި ހިތާދޫއިން ލީޑު ނަގާފައިވާއިރު މިލަނޑު އެޓީމަށް ކާމިޔާބުކޮށްދީފައިވަނީ ހައިޝަމް އަލީއެވެ. މުޅި މެޗުގައި ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންގޮސްފައިވާއިރު ހިތާދޫ މެޗުގެ ލީޑު ނެގިފަހުން ތިމަރަފުށިން ވަނީ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައެވެ.
ނަމަވެސް ހިތާދޫގެ ކީޕަރު ފޫއަޅުވާފައި ގޯލެއް ފެނިގެންގޮސްފައެއް ނުވެއެވެ. މެޗުގެ ނަތީޖާއަށް ދެވަނަ ހާފުގައިވެސް ބަދަލެއް ނުގެނެވި މެޗު ނިމިގެން ގޮސްފައިވަނީ ތިމަރަފުއްޓަށް އެމީހުންގެ ތަށި ދިފާއު ނުކުރެވި ހިތާދޫ އާ ޗެމްޕިއަނުންގެ ގޮތުގައި ހޮވިގެންނެވެ.
މެޗު ނިމިގެން ޝަރަފުވެރި މެހެމާނު އެފްއޭއެމްގެ ނޯމަލައިޒޭޝަން ކޮމިޓީގެ ޗެއާމަން ބައްސާމް އަދީލް ޖަލީލް ވަނީ މުބާރާތުގެ ޗެމްޕިއަން ހިތާދޫ ޓީމަށް މެޑަލް އަދި ތަށްޓާއިއެކު ފައިސާގެ އިނާމު ހަވާލުކޮށްފައެވެ. މުބާރާތުގެ ޗެމްޕިއަން ޓީމަށް ބައިލައްކަ ރުފިޔާގެ ފައިސާގެ އިނާމު ލިބިފައިވާއިރު ރަނަރަޕް ޓީމަށް 15،000 ރުފިޔާގެ ފައިސާގެ އިނާމު ލިބިފައިވެއެވެ.
ޗެމްޕިއަންގެ އިތުރުން މުބާރާތުގެ އެކި ވަނަތަށް ހާސިލު ކޮށްފައިވާ ކުޅުންތެރިންނާ ޓީމުތަކައް ވަނީ ހޮވާފައެވެ. އެގޮތުން މުބާރާތުގެ މޮޅު ކުޅުންތެރިޔަކަށް ހިތާދޫ ޓީމުގެ ހުޒެއިފަތު ރަޝީދު ހޮވުނުއިރު އޭނާ ވަނީ މުބާރާތުގެ ގަދަ ފަހެއްގެ ތެރޭގައިވެސް ހިމެނިފައެވެ. އޭނާގެ އިތުރުން މިމަގާމު ހާސިލުކޮށްފައިވަނީ ގެމަނަފުށީ ޓީމުގެ އިބްރާހިމް ހަމްދާން އާއި އަލިފުށި ޓީމުގެ އިސްމާއިލް މަމްދޫހު އާއި ހިތާދޫ ޓީމުގެ އަހުމަދު ހުސެއިންގެ އިތުރުން ތިމަރަފުށީ ޓީމުގެ ޝިނާންއެވެ.
މުބާރާތުގެ އުއްމީދީ ކުޅުންތެރިއަކަށް މާއެނބޫދޫ ޓީމުގެ މުހައްމަދު ޝާހު ހޮވުނުއިރު، މުބާރާތުގެ މޮޅު ކޯޗަކަށް ހޮވިފައިވަނީ ހިތާދޫ ޓީމުގެ ކޯޗު މަޒްހަރު އަބްދުﷲ އެވެ. އެންމެ މޮޅު ގޯލްކީޕަރަކަށް ހޮވިފައިވަނީ ހިތާދޫ ޓީމުގެ ގޯލްކީޕަރު އަހުމަދު އިސްމާއިލްއެވެ.
ކުޅިވަރުގެ ރޫހާ އެއްގޮތަށް ސަޕޯޓުކުރި ޓީމަކަށް ހިތާދޫ ޓީމު ހޮވުނުއިރު، ފެއާ ޕްލޭ ކުޅުންތެރިއަކަށް ހޮވިފައިވަނީ އަލިފުށި ޓީމުގެ މުހައްމަދު ރަޝީދުއެވެ. އަދި ފެއާޕްލޭ ޓީމަކަށް ހޮވިފައިވަނީ މާއެނބޫދޫ ޓީމެވެ.
އެންމެ ގިނަ ގޯލު ޖެހި ކުޅުންތެރިޔަކަށް ދެކުޅުންތެރިޔަކު ހޮވިފައިވާއިރު ލ.ގަމު ޓީމުގެ ހަލީމާއި މާއެނބޫދޫ ޓީމުގެ ޝާހު، ދެކުޅުންތެރިންވެސް ވަނީ މުބާރާތުގައި 12 ގޯލު ޖަހާފައެވެ.