ޒުވާނުން ވިޔަފާރިވެރިން އުފެއްދުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން 30 ފަރާތަކަށް ގެޓްސެޓް ލޯން ދޫކޮށްފައިވާ ކަމަށް އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ގެޓްސެޓް ޕްރޮގްރާމް މެނޭޖަރު މަހީލް އަލީ ޖަލީލް ވިދާޅުވީ ސަރުކާރުން ދޫކުރާ ގެޓްސެޓް ލޯންގެ ތެރެއިން މިފަހަރު ހަމަޖެހުނު 34 ފަރާތުގެ ތެރެއިން 30 ފަރާތަކަށް މިހާތަނަށް ފައިސާ ދޫކޮށްފައިވާ ކަމަށެވެ.
އަދި ބާކީ ހުރި 4 ފަރާތަށް ފައިސާ ދޫކުރުމުގެ މަސައްކަތް ކުރަމުން އަންނަ ކަމަށް މަހީލް ވިދާޅުވިއެވެ.
5 އަހަރަށް ބަހާލައިގެން ކުރިއަށް ގެންދާ މި މަޝްރޫއަށް ސަރުކާރުން 200 މިލިއަން ރުފިޔާ ކަނޑައަޅާފައިވާ އިރު މިއަހަރު ދެން ދޫކުރުމަށް ހަމަޖެހިފައިވާ ލޯން ތަކަށް ކުރިމަތި ލުމުގެ ފުރުސަތު ވަރަށް އަވަހަށް ހުޅުވާލާނެ ކަމަށް މަހީލް ވިދާޅުވިއެވެ.
މަހީލް ވިދާޅުވީ ޒުވާނުންނަށް ސަރުކާރުން ދޫކުރާ ލޯންގެ ތެރެއިން ބައެއް ފަރާތްތަކުން މިހާރު ވިޔަފާރި ފަށައިގެން ކުރިއަށްދާ ކަމަށެވެ. އެގޮތުން ފަރުރުވެރިކަމުގެ ދާއިރާ އާއި، ފިޓްނަސް ސެންޓަރުތަކާއި އަދި ލޮޖިސްޓިކް ދާއިރާއިން ވިޔަފާރި ފަށާފައިވާ ކަމަށް މަހީލް ވިދާޅުވިއެވެ.