ސީރިޔާގައި ޖަލު ހުކުމެއް ތަންފީޒުކޮށްފައި ހުރި މީހަކު މަރުވެއްޖެކަމަށް ފޮރިން މިނިސްޓްރީން ކަށަވަރުކޮށްފިއެވެ. މިމީހާ މަރުވެފައިވަނީ ޖަލު ހުކުމް ތަންފީޒު ކުރުމަށްފަހު ރާއްޖެ ނާދެވިފައި ހުރެއެވެ.
ފޮރިން މިނިސްޓްރީން މިމީހާއާ ގުޅޭ މާގިނަ މައުލޫމާތުތަކެއް މީޑިޔާއާ ހިއްސާކޮށްފައި ނުވާއިރު 'އައްޑޫލައިވް' އަށް މައުލޫމާތު ލިބިފައިވާގޮތުން މަރުވެފައިވަނީ އިބްރާހީމް އަބްދުލްރަހްމާން ނަމަކަށް ކިޔާ މީހެކެވެ. އެޑްރެސް، އަތޮޅު ރަށެއްވެސް މިނިސްޓްރީން ހާމަކޮށްފައި ނުވާއިރު މިމީހާ ޖަލަށް ލާން ހުކުމް ކޮށްފައިވަނީ ކޮން މައްސަލައަކާ ގުޅިގެން ކަމަށްވެސް ހާމަކޮށްފައެއް ނުވެއެވެ.
ނަމަވެސް މިނިސްޓްރީން ބުނެފައިވާގޮތުން މިމީހާ މަރުވެފައިވަނީ ސިއްހީ މައްސަލައަކާ ގުޅިގެންނެވެ. މީގެ އިތުރުން މަރުހޫމްގެ އާއިލާއަށް މިޚަބަރު މިހާރު ވަނީ ފޯރުވާދީފައި ކަމަށާއި ސީރިޔާގައި އެމީހާ އުޅުނު ގޮތް މިނިސްޓްރީންވަނީ ކައިރިން ބަލާފައި ކަމަށާއި އެމީހާގެ ހާލުއަހުވާލު އާއިލާއާ ހިއްސާކޮށްފައިވާނެ ކަމަށްވެސް މިނިސްޓްރީން ބުނެފައިވެއެވެ.
ޖަލު ހުކުމެއް ތަންފީޒުކޮށްފައިވާ މިމީހާ ވަނީ ރާއްޖެއަށް އައުމުގެ މަގުތައް ހަމަޖައްސާފައެވެ. ނަމަވެސް ގައުމަށް އެނބުރި ނާދެވިފައިހުރީ އިދާރީ މައްސަލައެއް ދިގުދެމިގެން ގޮސްފައިވުމުންނެވެ.