އައްޑު އާއި ފުވައްމުލަކުގެ ކުނި މެނޭޖް ކުރުމަށް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އާއި މިއަދު ސަރުކާރުން ހަވާލުކޮށްފި އެވެ.
އަބޫދާބީ ފަންޑް ފޯ ޑިވެލޮޕްމަންޓްގެ ލޯން އެހީގެ ދަށުން އައްޑޫ އަދި ފުވައްމުލަކުގައި ކުނި މެނޭޖް ކުރުމަށް އެމްއާރްޑީސީ އާއި ހަވާލު ކުރިއިރު މި މަސައްކަތުގެ އަމަލީ މަސައްކަތް މިއަހަރު ފެށިގެންދާނެ ކަމަށް އެންވައިރަމެންޓް މިނިސްޓަރ ޠޯރިގް އިބްރާހިމް ވިދާޅުވި އެވެ.
ފުވައްމުލަކުގައި ރަށު ފެންވަރުގައި ކުނި ޖަމާކުރެވޭނެ ނިޒާމެއް ގާއިމް ކުރާ އިރު މުސްތަގްބަލްގައި ފުވައްމުލަކުގައި އުފެދޭ ކުނި އައްޑޫ ކުނިކޮށްޓަށް ގެނައުމަށް ނިންމާފައިވާ ކަމަށް ޠޯރިގް ވިދާޅުވިއެވެ.
ޠޯރިގް ވިދާޅުވީ އައްޑޫ އާއި ފުވައްމުލަކުގެ ކުނި މެނޭޖްކުރުމުގެ މަސައްކަތް ކުރިއަށް ގެންދަން ހަމަޖެހިފައިވަނީ ގޭގެއިންނާއި، ވިޔަފާރުކުރާ ތަންތަނުން އަދި ސިނާއީ މަސައްކަތްކުރާ ތަންތަނުން ފީއެއް ނަގައިން ކަމަށެވެ. އަދި އިތުރަށް ބޭނުންވާ ހަރަދުތައް ސަރުކާރުން ވަކި ސީލިންގް އެއްގެ ދަށުން ސަބްސިޑީއެއް ދައްކާގޮތަށް ހަމަޖެހިފައިވާ ކަމަށެވެ
އައްޑޫ އަދި ފުވައްމުލަކުގެ ކުނި ގޮޑު މިހާރުވެސް ބަލަހައްޓަނީ އެމްއާރްޑީސީންނެވެ. އެގޮތުން މިހާރުވެސް އައްޑޫގެ ގެތަކުން ހިލޭ އެމްއާރްޑީސީން އަންނަނީ ކުނި ނަގަމުންނެވެ.
އައްޑޫ އާއި ފުވައްމުލަކުގައި ކުނީގެ މައްސަލަ ބޮޑުވެފައިވާ އިރު މިދެ އަތޮޅުގެ ގުދުރަތީ ރީތިކަން ވަނީ ކުނީގެ ސަބަބުން ހުތުރުވެފައެވެ. މިކަމަކީ ރައްޔިތުންގެ އެންމެ ބޮޑު އެއް ކަންބޮޑުވުމެވެ.