މާލެ ކައިރީ އޮންނަ ތިލަފުށި ކައިރިން ދޯންޏެއް ބަންޑުން ޖަހާލައިފިއެވެ. މިއަދުގެ އިރުއޮއްސުނު ވަގުތުގައި ހިނގި މިހާދިސާގައި ދޯނީގައި ތިބި ފަސް މީހުންވެސް ވަނީ ގެއްލުމެއް ނުވެ ގައުމީ ދިފާއީ ބާރުގެ އެހީގައި ސަލާމަތްކުރެވިފައެވެ.
އެމްއެންޑީއެފްގެ ކޯސްޓް ގާޑުން މައުލޫމާތު ދިން ގޮތުގައި މިހާދިސާ ހިނގާފައިވަނީ އެރަށު ނެރު ކައިރިންނެވެ. މިއަދު އިރުއޮއްސުނު ގަޑީގައި ތިލަފުށިން ދަތުރުކުރި މިދޯނި އާދަޔާހިލާފަށް ކަނޑުގަދަ ވުމުގެ ސަބަބުން ބަންޑުން ޖަހާލީކަމަށެވެ. މީގެ އިތުރުން ތިލަފުށީ ފަޅުގައި އަޅާފައި އޮތް 3 ދޯންޏެއްގެ ވާގަނޑުވެސް ވަނީ އެހާކަށްހާއިރު ކަނޑައިގެންގޮސްފައެވެ. ވާގަނޑު ކަނޑައިގެންދިއުމުގެ ސަބަބުން އެތިން ދޯނި ވަނީ ފަރު މައްޗަށް ލައްގާފައެވެ.
ރާއްޖޭގެ އެކި ހިސާބުތަކަށް ގަދަޔަށް ވިއްސާރަ ކުރަމުން ދާއިރު އެންމެ ކަނޑުގަދަ ވެފައި ވިއްސާރަ ވަނީ މެދު ރާއްޖެތެރެއަށެވެ. އެހީސާބަށް މިހާރު ވަނީ ޔެލޯ އެލާޓުވެސް ނެރެފައެވެ. ކޮންމެހެން ކުރަން ޖެހޭ ދަތުރެއް ނޫނީ ނުކުރުމަށް އެމްއެންޑީއެފް އިން ރައްޔިތުންނަށް އިލްތިމާސް ކުރައްވާފައިވާއިރު ކަނޑުދަތުރު ކުރާ ފަރާތްތަކުން ސަލާމަތީ ހުރިހާ ފިޔަވަޅެއް އެޅުމަށްވެސް ދިފާއީ ބާރުން ވަނީ އަންގާފައެވެ.
އަދި ފަޅުތެރޭގައާއި ފަޅުން ބޭރުގައި އަޅާފައިވާ އުޅަނދުފަހަރުގެ ވެރިންނާއި އެއެއްޗެއްސާ ހަވާލުވެފައިވާ ފަރާތްތަކުންވެސް އޮޑިދޯނިފަހަރު ބެލެހެއްޓުމާއި ދިޔަހިއްކުމަށް ސަމާލުކަން ދިނުމަށް ވެސް އެމްއެންޑީއެފުން އެދެއެވެ.