ރާއްޖޭން އީރާނާ އެކު އޮންނަ ސިޔާސީ ގުޅުން ކަނޑާލަން ސަރުކާރުން ނިންމައިފި އެވެ.
މި ނިންމުމާ ގުޅިގެން ފޮރިން މިނިސްޓްރީން މިރޭ ނެރުނު ބަޔާނެއްގައި ބުނީ އިރާނާ އެކު ސިޔާސީ ގުޅުން ކަނޑާލަން ނިންމީ އަރަބި ގަލްފު ސަރަޙައްދުގެ ހަމަޖެހުމާއި ސުލްހަ ދެމެހެއްޓުމަކީ، ރާއްޖޭގެ ސަލާމަތާއި ހަމަޖެހުމާ ވެސް ގުޅިފައިވާ ކަމަކަށްވާތީ ކަމަށެވެ. އަދި އެ ސަރަހައްދުގެ ސުލްހައަށް އިރާނުން ހުރަސް އަޅަމުން ގެންދިއުމަކީ ރާއްޖޭން ކުށްވެރިކުރާ ކަމެއް ކަމަށް ކަމަށް ބަޔާނުގައި ބުނެފައިވެ އެވެ.
ފޮރިން މިނިސްޓްރީގެ ބަޔާނުގައި އަދި ބުނީ މިދިޔަ އެޕްރީލް މަހު ތުރުކީގައި ބޭއްވި އިސްލާމިކް ސަމިޓް (އޯއަސީ) ގައި، އިސްލާމީ ގައުމުތަކުން އެހެން ގައުމުތަކުގެ ދާޚިލީ ކަންކަމަށް ނުފޫޒު ނުފޯރުވައި، ގައުމުތަކުގެ މިނިވަންކަމާއި އިސްތިގުލާލަށް އިހުތިރާމް ކުރުމަށާއި ދެބަސްވުމާއި ހިޔާލު ތަފާތުވުންތައް ނައްތާލުމުގައި އޯއައިސީ އާއިި ޔޫއެން ޗާޓަރާ އެއްގޮތަށް ސުލްޙަވެރި ގޮތްތައް އިހްތިޔާރު ކުރަން ނިންމާފައި ކަމަށެވެ. އަދި އެގޮތަށް އަމަލު ކުރުމަށް އިރާނަށް ގޮވާލާފައިވާނޭ ކަމަށްވެސް ބަޔާނުގައި ބުނެފައިވެ އެވެ،
ފޮރިން މިނިސްޓްރީން ބުނީ ރާއްޖޭން އަބަދުވެސް ދެކެން ބޭނުން ވަނީ އޯއައިސީން ގޮވާލާފައިވާ ކަންތައްތައް ފުރިހަމައަށް އަދި ނަތީޖާ ނެރެވޭނެ ގޮތަކަށް، އިރާނުން ތަންފީޒު ކުރުން ކަމަށެވެ.
ރާއްޖޭން އީރާނާ އެކު ބާއްވަމުން ދިޔަ ސިޔާސީ ގުޅުން ނިމުމަކަށް ގެނައި އިރު މީގެ 23 ދުވަސް ކުރިން އީރާނުން ރާއްޖެ އަށް ކަނޑައެޅި އާ ސަފީރު މުހައްމަދު ޒައޭރީ އަމިރާނީ ވަނީ ރައީސް އަބްދުﷲ ޔާމީނާ ބައްދަލު ކުރައްވާ އޭނާގެ ސަފީރު ކަމުގެ ފަތްކޮޅު ވެސް އަރުވައިފަ އެވެ.
ރާއްޖޭން އީރާނާ އެކު ސިޔާސީ ގުޅުން ގާއިމު ކުރީ ޖޫން 2، 1975 ގަ އެވެ.