ހުޅުދު އާއި މީދޫގެ ނަރުދަމާ ވެސް ބިޑަށް

ހުޅުދު އާއި މީދޫގައި ވެސް ނަރުދަމާ ނިޒާމް ގާއިމުކޮށް ދޭނެ ބަޔަކު ހޯދަން ފިނޭންސް މިނިސްޓްރީން ބީލަމަށް ލައިފި އެވެ.

އެ މިނިސްޓްރީން ނެރެފައިވާ އިއުލާނެއްގައި ބުނެފައި ވަނީ މި މަޝްްރޫއު ކުރިއަށް ގެންދަން ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 2 ވަނަ ދުވަހާ ހަމައަށް ހުޅުވާލައިފައިވާ ކަމަށެވެ.

ބީލަމުގައި ބައިވެރިވާން ބޭނުންވާ ފަރާތްތަކަށް މިހާރު އަންނަނީ ރަޖިސްޓްރީ ވެސް ކޮށް ދެމުންނެވެ. ރަޖިސްޓްރޭޝަން ފީއެއްގެ ގޮތުގައި 1،500ރ. ދައްކަން ޖެހެ އެވެ.

އޯޕެކް ފަންޑް ފޮ އިންޓަނޭޝަނަލް ޑިވެލޮޕްމަންޓް (އޮފިޑް) ގެ ލޯން އެހީ އާއި ދައުލަތުގެ ބަޖެޓުން ވެސް ހަރަދުކޮށްގެން ހުޅުދު އާއި މީދޫގެ ނަރުދަމާ ނިޒާމް ގާއިމު ކުރަން ހަމަޖެހިފައިވާ އިރު، މި މަޝްރޫއަށް ޝައުގުވެރިވާ ފަރާތްތަކަށް ބިޑް ސެކިއުރިޓީގެ ގޮތުގައި 462،000ރ. ހުށަހަޅަން ޖެހެ އެވެ.

ބިޑް ސެކިއުރިޓީގެ މުއްދަތަކީ ބިޑް ހުޅުވާން ދުވަހުން ފެށިގެން 148 ދުވަހެވެ.

ބިޑް ހުޅުވަން ހަމަޖެހިފައި ވަނީ އަންނަ މަހުގެ 7 ވަނަ ދުވަހު އެވެ.

ފިނޭންސް މިނިސްޓްރީން ބުނީ ޕާފޯމަންސް ސެކިއުރިޓީގެ ގޮތުގައި ހުށަހަޅަން ޖެހޭނީ ކޮންޓްރެކްޓް އަގުގެ 10 ޕަސަންޓް ކަމަށާއި އެޑްވާންސް ޕޭމަންޓްގެ ގޮތުގައި ކޮންޓްރެކްޓް އަގުގެ 15 ޕަސަންޓް އެޑްވާންސް ޕޭމަންޓް ގެރެންޓީއެއް ހުށަހެޅުމުން ލިބޭނެ ކަމަށެވެ.

ހުޅުދު އާއި މީދޫގެ އިތުރުން މަރަދޫ، މަރަދޫފޭދޫ އަދި ފޭދޫގެ ނަރުނަދާ ނިޒާމް ވެސް އޯޕިޑްގެ ލޯން އެހީގައި ކުރިއަށް ގެންދަން ނިންމައި، އެ މަޝްރޫއަށް ޝައުގުވެރިވާ ފަރާތްތަކަށް ވަނީ ބީލަން ހުށަހެޅުމުގެ ފުރުސަތު ހުޅުވާލައިފަ އެވެ.