ކުރިއަށް އޮތް ރޯދަ މަހާ ދިމާކޮށް މޯލްޑިވްސް އިސްލާމިކް ބޭންކް (އެމްއައިބީ) އިން ކަސްޓަމަރުންނަށް ހާއްސަ ރޯދަ ޕްރޮމޯޝަނެއް ފަށައިފި އެވެ.
އައްޑޫގައި ބްރާންޗެއް ހުންނަ އެމްއައިބީން ބުނީ ޕްރޮމޯޝަންގައި ކަސްޓަމަރުންނަށް 150،000ރ. އާ ހަމައަށް އެ ބޭންކާ އެކު މުއާމަލާތް ކުރާ ފިހާރަތަކުން މުދާ ނެގޭނެ ކަމަށެވެ. އެގޮތަށް ނަގާ ފައިސާ ދައްކަން 30 މަހުގެ މުއްދަތެއް ލިބޭނެ ކަމަށް ވެސް އެމްއައިބީން ބުންޏެވެ.
ޕްރޮމޯޝަންގައި ގޭތެރޭގައި ހިފައި ގެންގުޅޭ ސާމާނާއި ފަރުނީޗަރާއި އިލެކްޓްރޯނިކް ސާމާނު ލިބޭނެ އެވެ. އަދި ކޮންސްޓްރަކްޝަން މަސައްކަތްތަކަށް ބޭނުންވާ ސާމާނާއި އިންޖީނު ވެސް ލިބޭނެ ކަމަށް އެމްއައިބީން ބުންޏެވެ.
އެ ބޭންކުން ބުނީ ޕްރޮމޯޝަންގައި ބައިވެރި ވާން ބޭނުންވާ ފަރާތްތައް ކޮންމެހެން އެމްއައިބީގެ އެކައުންޓެއް އޮންނަން ނުޖެހޭ ކަމަށެވެ.
އެކަމަކު މި ޕްރޮމޯޝަމުގައި ބައިވެރިވެވޭނީ ކޮންޒިއުމާ ފައިނޭންސިން ހިދުމަތުގައި ރަޖިސްޓްރީކޮށްފައިވާ ކުންފުނިތަކުގައި މަސައްކަތް ކުރާ މުވައްޒަފުންނަށެވެ. އަދި މުވައްޒަފުންނަށް މުދާ ނެގޭނީ އެ މުވައްޒަފުންގެ މުސާރައަށް ބަލައި މުސާރައިގެ ބައި ކުޅަ އެއްބަޔަށް ވުރެ ބޮޑު ނުވާ ފަދަ މުދާ ކަމަށް އެމްއައިބީން ބުންޏެވެ.
ޕްރޮމޯޝަންގެ ދަށުން ހުށަހަޅާ ކޮންމެ ފޯމަކާ އެކު ތިން ކޯޓޭޝަން ހުށަހެޅެ އެވެ. އަދި ޕްރޮމޯޝަންގެ ދަށުން ނަގާ މުދަލުގެ ޖުމްލަ އަގު 60،000ރ. އަށް ވުރެ މަތިވާ ނަމަ، އެޑްވާންސް ޕޭމަންޓްގެ ގޮތުގައި އަގުގެ ފަސް ޕަސެންޓް ދައްކަން ޖެހޭނެ ކަމަށް އެމްއައިބީން ބުންޏެވެ.
އައްޑޫގައި އެމްއައިބީގެ ޕްރޮމޯޝަން ކުރިއަށްދާ ތަންތަނަކީ ބްރައިޓް ލިންކް. ސެލް ޓޯކް، ޗެކް މާކް ވިލާ، ސިޓީ ސެންޓްރަލް، ޑީއެޗް ހާޑްވެއާ، ފަޒާ، ފަޒާ ބިޒްނަސް އިންވެސްޓްމަންޓް، ޖެނެރަސް، ގޯދި، އައިޓީ މޭޓް، މެބްސް، މަލްޓި ސްޓޯރް، ނައީމީ ޓްރޭޑިން، ނެނޯ ލެބް އަދި ވަން ޕްލަސް ހޮލްޑިން އެވެ.