ކުރިއަށް އޮތް ހަފުތާއެއްހާ ދުވަހުގެ ތެރޭގައި ފޭދޫ ބިން ހިއްކައި ނިންމައި ލެވޭނެ ކަމަށް ހައުސިން މިނިސްޓްރީން ބުނެފި އެވެ.
އައްޑޫގައި ހުންނަވާ ހައުސިން މިނިސްޓްރީގެ ކޯޑިނޭޓަރު މުހައްމަދު ފައިސަލް މިރޭ "އައްޑޫ ލައިވް" އަށް ވިދާޅުވީ ބިން ހިއްކުމުގެ މަސައްކަތް ރޭވިފައިވާ ގޮތަށް، ވަރަށް ބާރަށް ކުރިއަށްދާ ކަމަށެވެ.
ފެދޫ ބިން ހިއްކަނީ ބިން ހިއްކުމުގެ ތަޖުރިބާ އެންމެ ބޮޑަށް ލިބިފައިވާ ކުންފުނިތަކުގެ ތެރޭގައި ހިމެނޭ ނެދަލެންޑްސްގެ ވައްނޫރު ޕްރައިވެޓް ލިމިޓެޑުންނެވެ. ފޭދޫ ބިން ހިއްކަން ފެށީ މި މަހުގެ ކުރީކޮޅު އެވެ.
ފައިސަލް ވިދާޅުވީ ހަފުތާއެއްގެ ތެރޭގައި ބިން ހިއްކައި ނިމޭ އިރު، ހިއްކި ބިމުގެ ސައިޒް 64 ހެކްޓަރު ވަރު ވާނެ ކަމަށެވެ. އޭނާ ވިދާޅުވީ ބިން ހިއްކައި ނިމުމާ އެކު ވައްނޫރު އިން ހިއްކި ބިން ހިމާޔަތް ކުރުމަށް ބޮޑު ހިލަ ޖަހަން ފަށާނެ ކަމަށެވެ.
"މުޅި މަސައްކަތް މި އަހަރުގެ ފަހުކޮޅަށް ނިންމައި ލެވޭނެ ރިވެޓްމަންޓް ޖެހުމާ އެެއްކޮށް،" އޭނާ ވިދާޅުވި އެވެ. "ދެން އެކި ކަންކަމަށް ބިން ދޫކުރަން ފެށޭވަރު ވާނެ މި އަހަރުގެ ފަހުކޮޅު."
ބިމުގެ ދަތިކަން ބޮޑުވެގެން ފޭދޫން ހިއްކާ ބިމުގެ ބޭނުން ކުރާނެ ގޮތުގެ ޕްލޭންތަކެއް ވެސް މިހާރު އަންނަނީ ހަދަމުންނެވެ.
ފައިސަލް ވިދާޅުވީ ހިއްކި ބިމުން ދިރިއުޅުމަށް ވެސް ގޯތި ދޫކޮށް، ފްލެޓް އަޅާނެ ސަރަހައްދުތައް ކަނޑައަޅައި، ސްކޫލާއި މިސްކިތާއި ފިހާރަތަކާއި ޕާކާއި ސްޕޯޓްސް އެރީނާ ހަދާނެ ސަރަހައްދުތައް ކަނޑައަޅާނެ ކަަމަށެވެ.
މީގެ އިތުރުން ހިއްކި ބިމުގައި ގެސްޓް ހައުސް ވިޔަފާރި އަށް ވެސް ބިން ހާއްސަ ކުރަން ވަނީ ނިންމައިފަ އެވެ.
ފޭދުއަކީ މީގެ ކުރިން ވެސް ބިން ހިއްކާފައިވާ ރަށެކެވެ. ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ފޭދޫން ބިން ހިއްކީ 1990 ގެ އަހަރުތަކު ތެރޭގަ އެވެ.