މިއީ ޕާކިސްތާނަށް އުފަން ދެ ކުއްޖެއްގެ ވާހަކަ އެވެ. އެކަކީ އުމުރުން 13 އަހަރުގެ ޝުއައިބް އަހުމަދެވެ. އަނެއް ކުއްޖާއަކީ އުމުރުން ނުވަ އަހަރުގެ އަބްދުއް ރާޝިދެވެ. މި ދެ ކުދިން ބަލާލެމުމަށް އެހެން އިންސާނުންނާ އެއްވެސް ތަފާތެއް ނެތެވެ. އެކަމަކު މިއީ އާދަޔާހިލާފު ދެ ކުދިންނެވެ.
އެ ދެ ކުދިންނަަށް ނިސްބަތް ކުރާ ނަމުން ވެސް އެކަން އެނގެ އެވެ. އެއީ "ސޯލާ ކިޑްސް" އެވެ. އެ ނަން ކިޔަނީ ކީއްވެ ބާވަ އެވެ؟ މިހާތަނަށް ސަބަބު ހޯދިފައި ނުވާ ޝުއައިބާއި ރާޝިދު އާންމު އެހެން އިންސާނުންނާ ތަފާތުވާ ތަންކޮޅަކީ އެ ދެ ކުދިންނަކީ ސޯލާ އިން ޗާޖްވާ ދެ ކުދިންނަށްވުމެވެ.
އެހެންކަމުން އިރުއޮއްސި އަނދިރިވުމުން ހަކަތަ ހުސްވެ، ހަރަކާތް ހުއްޓި ވާހަކަ ދެއްކުމުން ވެސް ދެ ކުދިން މަހުރޫމުވެ އެވެ. އެހެން ގޮތަކަށް ބުނާ ނަމަ އިރުއޮއްސި އަނދިރިވުމާ އެކު ދެ ކުދިން ވެސް ވާގިނެތެނީ އެވެ.
މިއީ އުފަންވީއްސުރެ އެ ދެ ކުދިންނަށް ދިމާވެފައިވާ މައްސަލައެކެވެ. ސްކޫލަށް ވެސް ކިޔަން ވެސް ދާ ޝުއައިބާއި ރަޝީދު ކުރަން ޖެހޭ ކަމެއް ނަމަ އެކަމެއް ކުރަން ޖެހެނީ ދުވާލު އެެވެ.
އިރުގެ އަލިކަން ހުއްޓަ އެވެ. ދުވާލު ގަޑީގައި އާންމު އެހެން މީހުންނެކޭ އެއްގޮތަށް ހިނގާބިގާވެ، ވާހަކަ ދައްކައި އުޅެވެ އެވެ.
އެކަމަކު ރޭގަނޑުވުމުން ދެ ކުދިން ވެސް ހަރަކާތް ހުއްޓި "ފުލްސްޓޮޕް" ޖެހެނީ އެވެ.
"މިހެން މިކަންވާތީ އަހަރެން ގަބޫލް ކުރަނީ އަހަރެންގެ ދެކުދިންނަށް ހަކަތަ ލިއްބައި ދެނީ ހަމައެކަނި އިރުގެ އަލިން ކަމަށް، ދެ ކުދިންގެ ބައްޕަ މުހައްމަދު ހާޝިމް ބުންޏެވެ.
މިއީ ކީއްވެގެން ދިމާވާ މައްސަލައެއް ކަމެއް ޑޮކްޓަރުންނަށް ވެސް މިހާތަނަށް ހޯދިފައެއް ނުވެ އެވެ.
އެހެން ނަމަވެސް މި އާދަޔާހިލާފުން ބަލިން ދެ ކުދިން ރަނގަޅުކޮށް، ހަމަ އާދައިފެ ދެ ކުދިންނަށް ހެދޭތޯ މިހާރު އަންނަނީ ފަރުވާ ދެމުންނެވެ.
ޕާކިސްތާންގެ ބަލޮޗިސްތާނަށް ނިސްބަތްވާ ދެ ކުދިންނަަށް މިހާރު ފަރުވާ ދެމުން އަންނަނީ ޕާކިސްތާން އިންސްޓިޓިއުޓް އޮފް މެޑިކަލް ސައިންސް (ޕީއައިއެމްއެސް) އިންނެވެ.
ޝުއައިބާއި ރާޝިދުގެ ފަރުވާގެ ހުރިހާ ހަރަދެއް ސަރުކާރުގެ ހިލޭ އެހީގައި ވަނީ ހަމަޖައްސައިފަ އެވެ.
ދެ ކުދިންނަށް ފަރުވާ ދޭ ހޮސްޕިޓަލްގެ ޕްރޮފެސަރު ޖާވިދް އަކްރަމް ވިދާޅުވީ "ސޯލާ ކިޑް" އިންނަށް ފަރުވާ ދިނުމަކީ ބޮޑު ގޮންޖެހުމެއް ކަމަށެވެ.
އޭނާ ވިދާޅުވީ ރޭގަނޑަށް ދެ ކުދިން ހަރަކާތް ހުއްޓެން ދިމާވަނީ ސީދާ ކޮން ސަބަބަކާ ހުރެ ކަމެއް އެއްގޮތަކަށް ވެސް ސާފު ނުވާ ކަމަށެވެ. އަދި މިއީ ބޭސްވެރިކަމުގެ މިފަދަ ޒަމާނެއްގައި ވެސް ހޯދިފައި ނެތް ހައިރާން ކުރުވަނިވި ބައްޔެއް ކަމަށް ޕްރޮފެސަރު ވަނީ ސިފަ ކުރައްވައިފަ އެވެ.
"އަހަރަމެންގެ ޓީމުން މިހާރު މި އަންނަނީ މި ދެ ކުދިންނަށް މި ދިމާވާ މައްސަލައިގެ ހަގީގަތް ހޯދަން ވަރަށް ބުރަކޮށް، ވަރަށް ފަރުވާތެރިކަމާ އެކު މަސައްކަތް ކުރަމުން،" ޖާވިދް ވިދާޅުވި އެވެ.
އޭނާ އަދި ވިދާޅުވީ މިހާރު ތަފާތު ޓެސްޓްތަކެއް ހަދަމުން އަންނަ އިރު، ކުރިއެރުންތަކެއް ލިބެމުންދާ ކަމުގެ ނިޝާންތަކެއް ވެސް ފެންނަމުންދާ ކަމަށެވެ.
"އަހަރެމެންނަށް އުންމީދު އެބަ އޮތް ދެ ކުދިން އާންމު ހާލަތަކަށް ބަދަލު ކުރެވޭނެ ކަމަށް،" ޖާވިދް ވިދާޅުވި އެވެ.
ޝުއައިބާއި ރާޝިދު ވެސް އުންމީދުކޮށްގެން ތިބީ އެ މީހުން އާދައިގެ އިންސާނުން އުޅޭ ގޮތަށް އުޅެވޭނެ ދުވަހެއް ފެންނާނެ ކަމަށެެވެ.
ޝުއިބް ބުނި ގޮތުގައި އޭނާ ބޮޑުވެގެން ވާން ބޭނުމީ ޓީޗަރަކަށެވެ. ރާޝިދު ބުނީ އޭނާ ވާނީ ދީނީ އިލްމުވެރިއަކަށް ކަމަށެވެ.