ކަސްރަތު ކުރުމަކީ ދުޅަހެޔޮ ސިއްހަތަކަށް އެންމެ މުހިއްމު އެއް ކަންތައްކަން މިހާރު އެންމެން ވެސް ދެނެ އެވެ. އެހެންވެ އަބަދު ވެސް ކަސްރަތު ކުރާށެވެ.
ދުވާލުގެ ކޮންމެވެސް ވަގުތެއް ކަސްރަތަށް ހާއްސަ ކުރާށެވެ. އެކަމަކު މާ ގިނައިން ކަސްރަތު ނުކުރާށެވެ.
ފަހުގެ ދިރާސާއުން މިހާރު ހާމަވެފައިވާ ގޮތުގައި އެކަށީގެންވާ މިންވަރަށް ވުރެ، ގިނައިން ކަސްރަތު ކުރުމަކީ ސިއްހީ ގޮތުން ތަފާތު އެތައް މައްސަލައެއް ހަށިގަނޑަށް ކުރިމަތި ކުރުވާނެ ކަމެކެވެ. ހަމައެކަނި ޖިސްމާނީ ގޮތަކުން ވެސް ނޫނެވެ.
މާ ގިނައިން ކަސްރަތު ކުރާ ނަމަ ނަފުސާނީ ގޮތުން ވެސް ގެއްލުން ހުރި ކަމަށް ތަޖުރިބާކާރުން ވިދާޅުވި އެވެ.
މާ ގިނައިން ނުވަތަ އާދަޔާހިލަށް ގިނައިން ކަސްރަތު ކުރާ ނަމަ ލިބޭ ގެއްލުންތަކުގެ ތެރޭގައި ހަށިގަނޑުގެ އެކި ތަންތަން ޒަހަމްވުން އާންމުވުމާއި ތަފާތު އަނިޔާތައއް އިތުރުވުމާއި މާ ބޮޑަށް ވަރުބަލިވެ، ބަލިވުން ހިމެނެ އެވެ.
ހަމަ މިއާ އެކު ހަމަ ނުދި ނުލިބުމާއި ހިތުގެ މައްސަލަތައް މާ ގިނައިން ކަސްރަތު ކުރާ ނަމަ ކުރިމަތި ވާން ފަށަ އެވެ.
އަދި ކެއުމުގެ ވައްޓަފާޅި އަށް ބަދަލު އައުމާއި ކެއުމާ ދުރަށް ދިއުމަކީ ވެސް މާ ގިނައިން ކަސްރަތު ކުރާ ނަމަ ދިމާވެދާނެ މައްސަލަތެކެވެ.
މީގެ އިތުރުން ނަފުސާނީ މައްސަލަތައް ކުރިމަތިވެ، ޑިޕްރެޝަނަށް ދިއުން ފަދަ ނުރައްކާތަކާ ވެސް، މާ ގިނައިން ކަސްރަތު ކުރާ ނަމަ ކުރިމަތި ވެދާނެ ކަމުގެ އިންޒާރު ތަޖުރިބާކާރުން ދެ އެވެ.
އެހެންވެ ކަސްރަތު ކުރުމުގައި މެދުމިންޑެއް ގެންގުޅޭށެވެ. އެއްވެސް ކަމެއްގައި ހައްދު ފަނަހައަޅައި ދިއުމަކީ ފައިދާ ކުރާނެ ކަމެއް ނޫނެވެ.