އައްޑޫ އިކްޓޯރިއަލް ކޮންވެންޝަން ސެންޓަރު (އީސީސީ) ވީރާނާކޮށްލުމަކީ ސަރުކާރުން ޕްލޭންކޮށްގެން ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެމްބަރު އަލީ ނިޒާރު ވިދާޅުވެއްޖެ އެވެ.
އޭނާ ކުރެއްވި ޓްވީޓެއްގައި ވިދާޅުވީ އީސީސީއަކީ ސަރުކާރު ހިންގާ ޕީޕީއެމަށް ހަޖަމް ނުވި ބޮލުގެ ރިހުމެއް ކަމަށެވެ.
"އައްޑޫ އީސީސީއަކީ ޕީޕީއެމްގެ ފިކުރަށް ހަމަޖު ނުވި ބޮލުގެ ރިހުމެއް. ވީރާނީކޮށްލަނީ ޕްލޭން ކުރެވިގެން ގަސްތުގައި،" ނިޒާރުގެ ޓްވީޓްގައި ވިދާޅުވި އެވެ.
އީސީސީ އަށް ސަރުކާރުން އަޅާނުލައި އެތަން ދޫކޮށްލުމުގެ ސަބަބުން ބޮޑެތި ގެއްލުންތަކެއް މިހާރު ވެސް ވަނި ލިބިފަ އެވެ.
Addu ECC akee PPM fikurah hajam nuvi bolu rihumei. Veeraana kollanee plan kurevigen gasthuga. pic.twitter.com/0iyGrwyZE5
— Ali Nizar (@DhekunuNizar) May 19, 2016
އެގޮތުން އިމާރާތުގައި ކަތުރުފަނި އަޅައި، ދަގަނޑުން ހުރި ތަންތަނުގައި ދަބަރު ޖަހައި މުޅި އިމާރާތް މިހާރު ވަނީ ބޮޑު މަރާމާތެއް ކުރަން ޖެހޭ ހާލަތުގަ އެވެ. އެތަން ވީރާނާވަމުން ދާތީ އައްޑޫ ރައްޔިތުން ގެންދަނީ ކަންބޮޑުވުން ވެސް ފާޅު ކުރަމުންނެވެ.
ދައުލަތުގެ ބަޖެޓްގައި އީސީސީ މަރާމާތު ކުރަން ކޮންމެ އަހަރަކު ފައިސާ ހިމެނި ނަމަވެސް، އެ ތަން މިހާތަނަށް ބަލަހައްޓައި މަރާމާތުކޮށްފައެއް ނުވެ އެވެ.
ސަރުކާރުން ބުނެފައިވާ ގޮތުގައި އީސީސީ ހޮސްޕިޓަލަކަށް ބަދަލު ކުރަން މިހާރު ވަނީ ނިންމައިފަ އެވެ. އަދި އެކަމާ ގުޅޭ ގޮތުން ސަރުކާރުން އަންނަނީ ލަފާ ހޯދަމުންނެވެ.
އީސީސީއަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2011 ވަނަ އަހަރު، 17 ވަނަ ސާކް ސަމިޓް ބާއްވަން އިމާރާތް ކުރި ތަނެކެވެ.
އެތަން ހެދީ ދައުލަތުގެ ބަޖެޓުން 200 މިލިއަނެއްހާ ރުފިޔާ ހަރަދުކޮށްގެންނެވެ.