ފުދުންތެރިކަން ކުޑަ ހިތަދޫގެ ނިކަމެތި އާއިލާއަކަށް ހިތަދޫ ނޫރުލް އިސްލާމް ޖަމިއްޔާ އިން އެހީތެރިކަން ފޯރުކޮށް ދީފި އެވެ.
ފަގީރު އާއިލާތަަކަށް އެހީތެރިކަން ފޯރުކޮށް ދިނުމުގެ ޕްރޮގްރާމްތަކެއް ހިންގަމުން އަންނަ ޖަމިއްޔާ އިން ބުނީ މި ފަހަރު އެހީތެރިކަން ފޯރުކޮށް ދިން އާއިލާގެ ހާލަތު ޖަމިއްޔާ އަށް އެނގުމުން، ޖަމިއްޔާގެ އޮފިޝަލުން އެ އާއިލާ ދިރިއުޅޭ ގެއަށް ޒިޔާރަތްކޮށް، އެ މީހުންގެ ހާލަތު އިތުރަށް ބެލި ކަމަށެވެ.
އެގޮތުން އެ އާއިލާ އަށް ކާޑާއި މަހާއިކައްކާ ގޭސް ފަދަ ބާވަތްތައް ފޯރުކޮށް ދީފައިވާ ކަމަށް ނޫރުލް އިސްލާމުން ބުންޏެވެ.
އެ ޖަމިއްޔާ އިން ބުނީ ފަގީރު އާއިލާތަކާ ބެހޭ މައުލޫމާތު ޖަމިއްޔާ އާ ހިއްސާ ކުރުމުން، އިތުރަށް ބަލައި އެހީތެރިކަން ފޯރުކޮށް ދޭން ޖެހޭ ނަމަ، އެހީތެރިކަން ފޯރުކޮށް ދެމުން ގެންދާނެ ކަމަށެވެ.
އެހެންވެ މިގޮތަށް ފޯރުކޮށް ދެވޭ އެހީގައި ބައިވެރިވުމަށް ދީލަތި ފަރާތްތަކަށް ނޫރުލް އިސްލާމުން ވަނީ ފުރުސަތު ހުޅުވާލައިފަ އެވެ.
އެ ޖަމިއްޔާ އިން ބުނީ ކޮންމެ ރޯދަ މަހަކު ކުރިއަށް ގެންދާ އެހީގެ ޕްރޮގްރާމަށް މިހާރު ވެސް 40 އާއިލާއަކުން ނަން ނޯޓްކޮށްފައިވާ ކަމަށެވެ.