ދިވެހި ސަރުކާރުގެ ފަރާތުން ރައްޔިތުންނަށް މާ ފައިދާ ބޮޑު ސިޔާސަތެއް ކުރިއަށް ގެންދަވަނީ ޔޯލަ އެެވެ. ރައްޔިތުން ގެދޮރުވެރިކުމުގެ ސިޔާސަތެވެ. ބޯހިޔާވަހި ކަމެއް ހޯދައިދޭ ވާހަކަ އެވެ.
އެ ސިޔާސަތު އިއުލާން ކުރުމާއި އެކު އެއްބަޔަކު އުފަލުން ފޮޅިއްޖެ އެވެ. ލޮލުން ކަރުނަ ހިލިއްޖެ އެވެ. އެ މީހުން ބުނާ ވާހަކައަކީ، "ސަރުކާރުން އަހަރުމެން ގެދޮރުވެރި ކުރުވަނީ" ކަމަށެވެ.
އެހެން ނަމަވެސް ހަޤީޤަތަކީ އެއީ ހެއްޔެވެ؟
ދައްކަން ފަށާނީ، އަމިއްލަ އަތޮޅުގެ ވާހަކައެވެ. އައްޑު އަތޮޅުގެ ވާހަކަ އެވެ.
އައްޑޫ އަކީ ރާއްޖެ އަށް ބަލާއިރު ނިސްބަތުން ބިން ބޮޑު އަތޮޅެކެވެ. އެހެން ނަމަވެސް މި އަތޮޅުގެ ރަށްތަކުން ގޯތި ދޫނުކުރާތާ އެތަކެއް އަހަރުތަކެއް މި ވަނީ ވެގެން ގޮސްފަ އެވެ.
އޭގެ ސަބަބުން، އަމިއްލަ ގެދޮރު ބިނާކުރުމުގެ ތަނަވަސްކަން ލިބިފައި ތިބި އެތައް ބަޔަކު، ކަންބޮޑުވުމެއްގެ ތެރޭގައި އެބަ ތިއްބެވެ.
އެއް ފުރާޅެއްގެ ދަށުގައި އެތައް އާއިލާއެއް ދިރިއުޅެން ޖެހުމުން ދިމާވާ މައްސަލަތަކަށް ޙައްލެއް ހޯދުމަށް ގިނަ ބަޔަކު ތިބީ ބޭނުންވެފައެވެ.
އަދި ކޮބައިތޯ އެވެ؟ ބިމެއް އޮތަސް ގިނަ ބަޔަކަށް އެ ބިމުގައި ގެއެއް ބިނާ ކުރެވޭނެ ގޮތެއް ނެތް މީހުންގެ އަދަދު ވެސް މަދެއް ނޫނެވެ. ފައިސާގެ ގޮތުން ތަނަވަސް ކަމެއް ނެތް އިރު، ބޭންކު ތަކުން ގެ ބިނާކުރަން ލޯނެއް ވެސް ލިބެން ނެތީއެވެ.
މިފަދަ ޙާލެއްގައި ދިިރިއުޅެމުން އައި ރައްޔިތުންގެ ޓެކްސް ފައިސާއިން "ނާޗަރަންގީ" ކުޅުއްވާ ސަރުކާރުން ގެދޮރުވެރި ކުރުމުގެ ސިޔާސަތުގެ ނަމުގައި ހަގީގަތުގައި މި ގެނެސްދިނީ ކުލި ދެއްކުމުގެ ނިޒާމެކެވެ. ކިތަންމެ ނުރުހުނަސް ހިތްހަމަނުޖެހުނަސް މިއަދު ރައްޔިތުންނަށް އެނޫން ގޮތެއް ނެތެވެ.
ޝަކުވާ ކުރީމާ ސަރުކާރުގެ ވެރިން ރައްޔިތުންނާއި މަލާމާތުގެ ރާގަކަށް ކުރައްވާ ސުވާލަކީ، "ބިމެއް އޮތަސް ކަލޭ މެންނަށް ގެ އެޅޭ ހެއްޔެވެ؟"
ޚުދު ރައްޔިތުމީހާ ވެސް މަޖުބޫރީ ޙާލަތުގައި އެއްބަސްވަނީ، ބިމެއް އޮތަސް ގެދޮރު ބިނާ ކުރާނެ ތަނަވަސް ކަމެއް ނެތް ކަމެވެ.
މިއީ، އިއްޔެ އަކު މިއަދަކު ސަރުކާރުތަކުން ފެށި ސިޔާސަތެއް ނޫނެވެ.
ރައްޔިތުން ގެދޮރުވެރިކުރުމުގެ ނަމުގައި ހުރިހާ ސަރުކާރަކުން ކުރައްވާ ކަމަކީ، ފްލެޓް ތަކަށް ރައްޔިތުން ވައްދައިގެން ކުލި ދެއްކުމަށް މަޖުބޫރުކުރުން ނޫން ކޮން ކަމެއްތޯ އެވެ؟
މަގުމަތީގައި ވެހިކަލް ދުއްވަން ބޭނުން ނަމަ ސަރުކާރަށް، ޖިޒީ ދައްކަން އެބަ ޖެހެ އެވެ. ކަންމަތީ ފިހާރައިން ކުރާ ކޮންމެ ވިޔަފާރިއަކުން ސަރުކާރަށް ޖިޒީ ދެއްކުން މަޖުބޫރެވެ.
ސާފު ބޯފެން ބޭނުން ނަމަ އަދި ކަރަންޓުގެ ޚިދުމަތް ހޯދުމަށް ޖިޒީ ދައްކަން ވީއެވެ. އެއީ ވެރިންގެ ޖީބު ފުރާލަން އެމީހުން ބޭނުންވާ މިންވަރަކަށެވެ.
ފާޚާނާ ކުރުމަށް ޖިޒީ ދައްކާފައި، ނުވިތާކަށް ދެން މި މަޖުބޫރު ކުރަނީ ދިރިއުޅެން ފޯރުކޮށްދޭ ކުޑަގޮޅި"ފްލެޓް ގޮޅި" އަށް ވެސް އުމުރު ދުވަހު ޖިޒީ ދެއްކުމަށެވެ.
އައްޑޫގެ ރަށްތަކުން ބިން ދޫކުރަން ސަރުކާރުން ޖެހިލުން ވަނީ ކީއްވެގެން ހެއްޔެވެ؟
ރައްޔިތުންނަށް ބިން ދޫކޮށްފައި އިންޓްރެސްޓް ފްރީ ލޯނުތަކެއް ސަރުކާރުން ރައްޔިތުންނަށް ފޯރުކޮށް ނުދެވެން ވީ ސަބަބެއް ނެތެވެ.
ދުނިޔޭގެ އެހެން ޤައުމުތައް މިސާލަކަށް ބަލަން ޖެހެނީ ސަރުކާރުން ބޭނުންވާ ކަންތައް ކުރުމުގައި އެކަނި ކަމަށް ވެދާނެއެވެ.
ނާޗަރަންގީ ކުޅުމަށާއި، ކުޅިވަރު ކުޅުމަށް، މިލިއަނުން ޚަރަދު ކުރުމަށް ފައިސާ ހުންނައިރު، ރައްޔިތުން ގެދޮރުވެރިކުުރުވުމަށް އަމިއްލަ ރަށުގައި އަމިއްލަ ބިމެއްގައި ގެއެއް ބިނާކުރުމަށް މާލީ އެހީތެރިކަން ފޯރުކޮށް ނުދެވޭނެ ސަބަބެއް ނެތެވެ.
މީގެ 20 އަހަރު ދުވަސް ފަހުން ފްލެޓްގެ އަގު ރައްޔިތު މީހާއަށް ދައްކައި ނިމޭ އިރު، އެ ފްލެޓް އޮންނާނީ ބޮލަށް ވެއްޓޭ ހިސާބުގަ އެވެ.
ދެން އަނެއްކާވެސް ދާން ޖެހޭނީ، ކުލި ދައްކަން އެހެން ފްލެޓަކަށެވެ. މުޅި އުމުރު ދުވަހު ކުރަން ޖެހޭނެ މަސައްކަތަކީ ކުލި ދެއްކުމެވެ.
ގެދޮރުވެރިކުރުމުގެ ނަމުގައި ހަގީގަތުގައި ވެސް ރާއްޖޭގެ ރައްޔިތުން އަޅުވެތި ކުރެވެނީ އެވެ. ދިވެހި ރައްޔިތަކަށް ވީތީ ފަޚުރުވެރިވި ދުވަސް މާޒީވެގެން ހިނގައްޖެ އެވެ.
މިހާރު އޮތީ ދިވެއްސަކަށް ވީތީ އަޅުވެތިކަމުގައި ސަރުކާރަށް ތަފާތު ނަންނަމުގައި ޖިޒީ ދެއްކުމެވެ.