ވަގުތު ޖެހުމުން ކުރިއަށް އޮތް ރިޔާސީ އިންތިހާބުގެ ކެމްޕޭނު ފައްޓަވާނެ ކަމަށް ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ޔާމީނުގެ ވެރިކަމަށް 913 ދުވަސް ފާހަގަ ކުރަން ރޭ ބޭއްވި "ފަހި 913" ޖަލްސާގައި ރައީސް ވިދާޅުވީ ވަގުތު ޖެހުމުން ކެމްޕޭން ފައްޓަވާނެ ކަމަށާއި އެކަމަށް ވަކި ފަރާތަކުން ހާއްސަ ހުއްދައެއް ނަގަން ނުޖެހޭ ކަމަށެވެ.
ރައީސް އަދި ވިދާޅުވީ ވަގުތު ޖެހުމުން ޕާޓީގެ ތެރެއިން ފުރިހަމަ ކުރައްވަން ޖެހިވަޑައިގަންނަވާ ކަންކަން ފުރިހަމަ ކުރައްވާނެ އެވެ.
ރައީސް މިހެން ވިދާޅުވި އިރު އެ މަނިކުފާނުގެ ޕީޕީއެމުން މިހާރު ވެސް އަންނަނީ "ރައީސް ޔާމީން 2018" ގެ ނަމުގައި ކެމްޕޭން ތަފާތު ހަރަކާތްތައް ހިންގަމުންކަން ފާހަގަކޮށްލެވެ އެވެ.
"އަޅުގަނޑުގެ މަސައްކަތް ކުރިއަށް އޮތް ދެ އަހަރު ބައިން ނުނިމޭނެ." ރައީސް ވިދާޅުވި އެވެ.
ރައީސް ވިދާޅުވީ އެމަނިކުފާނު ރައީސްކަމަށް ވަޑައިގެންނެވި މަގުސަދާއި މަސައްކަތްތައް ނިމޭނީ ރާއްޖެއަކީ ދުބާއީ އަދި ސިންގަޕޫރާ އަޅާކިޔާލެވޭވަރުގެ ގައުމަކަށްވުމުން ކަމަށެވެ.
އަދި އެ މަސައްކަތް އެއްކޮށް ނިމޭނީ ދުނިޔޭގެ އެންމެ ބޮޑު ކަނޑު، އެޓްލާންޓިކް ކަނޑު ހުރަސްކޮށް ޔޫރަޕާއި އެމެރިކާގެ ހިސާބުތަކަށް ރާއްޖޭގެ ގައުމީ އެއާލައިން، މޯލްޑިވިއަން ދަތުރުކުރާ ހިސާބުން ކަމަށް ރައީސް ވިދާޅުވި އެވެ.
ރައީސް ޔާމީން ވިދާޅުވީ މާލޭ ތަރައްގީކޮށް އެއާޕޯޓް ނިމުމުން ސިންގަޕޫރު އަދި ދުބާއީގައި ދޭ ހިދުމަތްތަކާ ރާއްޖެ އާ އަޅާކިޔާލުމުން ސަރުކާރުގެ މަސައްކަތް އެ ދާއިރާއިން ނިމުނީ ކަމަށެވެ.
"އަޅުގަނޑުމެން މި ދައްކާ ވާހަކައަކީ ރާއްޖެއަށް އެކި ހިސާބުތަކުން ބޮޑެތި އިންވެސްޓްމެންޓްތައް އަންނަ ވާހަކަ، މެރީނާ އަޅާ ވާހަކަ އެބަ ދައްކަން، އެއާޕޯޓްގައި ޓާމިނަލް އަޅާ ވާހަކަ އެބަ ދައްކަން،" ރައީސް ވިދާޅުވި އެވެ. "މި ދައްކަނީ ބޭރު މީހުން ބޭރުގެ ފައިސާ ހިފައިގެން ރާއްޖެ އަންނަ ވާހަކަ، އަޅުގަނޑުމެން ބޭނުން ވަނީ ރާއްޖެއަކީ ސިންގަޕޫރު ފަދަ ކުރިއަރާފައިވާ ގައުމަކަށްވާން ކަމުގައިވާ ނަމަ މެރީނާ ހަދާ ވާހަކަ ދައްކަނީ ހުޅުމާލޭގައި،"
ކުރިއަށް އޮތް ދެ އަހަރާއި ބައިގެ ތެރޭގައި އައިޖީއެމްއެޗްގެ 25 ބުރީގެ އިމާރާތްއެއްކޮށް ނިމި ބޭސް ފަރުވާގެ ހިދުމަތްދޭން ފަށައި ސަރަހައްދުގައި ލިބޭ އެންމެ މަތީގެ ފެންވަރުގެ ބޭސްފަރުވާ ރައްޔިތުންނަށް ލިބޭ ތަން ބަލަން ބޭނުންފުޅުވާ ކަމަށް ޗެސް ރައީސް ޔާމިން ވިދާޅުވިއެވެ.
ރައީސް ޔާމިން ވިދާޅުވި ގޮތުގައި ރާއްޖެއަކީ އެންމެ ގިނަ މީހުން އަންނަން ބޭނުންވާ ތަނަކަށް ވެގެން ދިޔުމަކީ އުއްމީދު ކުރައްވާ ކަމެެއް ކަމަށެވެ.