މަރަދޫ ގޯދިއްޔާ ޖަމިއްޔާ އިން ބާއްވަމުން އަންނަ ގޯދިއްޔާ ފުޓްސަލް ކަޕްގައި މި އަހަރު ވެސް 20 ޓީމް ވާދަ ކުރާނެ ކަމަށާއި ޓީމްތަކުގެ މެދުގައި ގުރުލުން އަންނަ މަހުގެ ހަ ވަނަ ދުވަހު އޮންނާނެ ކަމަށް އެ ޖަމިއްޔާ އިން ބުނެފި އެވެ.
ގޯދިއްޔާގެ ޖެނެރަލް ސެކްރެޓަރީ ހުސައިން އާބިދު "އައްޑޫ ލައިވް" އަށް މިއަދު ބުނީ މި އަހަރު ވެސް މުބާރާތުގައި 20 ޓީމް ވާދަ ކުރާ އިރު، މި ފަހަރު އެމްއެންޑީއެފާއި ޕޮލިހާއި ފެނަކަ އިން ވެސް މުބާރާތުގައި ވާދަ ކުރާނެ ކަމަށެވެ.
"ރޯދަ މަހުގެ ފުރަތަމަ ދުވަހުގެ ރޭ ޓީމްތަކުގެ މެދުގައި ގުރުލުން ބާއްވަން މިހާރު ތާވަލްކޮށްފައި ވަނީ،" އޭނާ ބުންޏެވެ.
ހަތަރު ގްރޫޕަކަށް ބަހާލައިގެން ކުރިއަށް ގެންދާ މުބާރާތުގެ ކޮންމެ ގްރޫޕެއްގައި ހިމެނޭނީ ފަސް ޓީމެވެ.
ރޯދަ މަހު ރޭގަނޑު މަރަދޫ ވެންބޮޅަފިށި ސްޓޭޑިއަމްގައި ކުރިއަށްދާ މުބާރާތް މި ފަހަރު ކުރިއަށް ދާނީ ޖޫން 12 އިން ޖުލައި 3 އާ ހަމައަށެވެ.
މުބާރާތުގެ ޗެމްޕިއަން ޓީމަށް މި ފަހަރު 65،000ރ. ހުށަހަޅާފައިވާ އިރު، މުބާރާތުގެ ޓައިޓްލް ސްޕޮންސަ މާދަމާ އިއުލާން ކުރާ ގޮތަށް ވަނީ ނިންމައިފަ އެވެ.
މިދިޔަ އަހަރު މިޓްސުބިޝީން ސްޕޮންސަކޮށްގެން ޗެމްޕިއަން ޓީމަށް 60،000ރ. ދިން މުބާރާތް ކާމިޔާބުކޮށްފައި ވަނީ ފޭދޫ އެފްސީ ހަބޭސް އެވެ.
"އަޅުގަނޑުމެން މި ބަލަނީ މިދިޔަ އަހަރަށް ވުރެ މި އަހަރުގެ މުބާރާތް ފޯރި ގަދަވާނެ ކަމަށް. ކުރީ އަހަރަށް ވުރެ މި އަހަރުގެ އިންތިޒާމްތައް ވެސް ރަނގަޅު ވާނެ،" މި އަހަރު ބާއްވަނީ ގޯދިއްޔާ ފުޓްސަލް ކަަޕްގެ ނުވަ ވަނަ މުބާރާތްކަން ފާހަގަކޮށް އާބިދު ބުންޏެވެ.
"ގޯދިއްޔާ ފުޓްސަލް ކަޕް 2016" ގެ ސެމީގެ މެޗްތަކާއި ފައިނަލް މެޗް ޕީއެސްއެމްގެ ޔެސް ޗެނަލުން ލައިވް ކުރާ ގޮތަށް ވެސް ހަމަޖެހިފައިވެ އެވެ.