އޭޝިޔާ ފައުންޑޭޝަން އިން އިންތިޒާމުކޮށްގެން އިންޑޮނޭޝިޔާގައި ބާއްވާ ކޮމިއުނިޓީ ޕޮލިސް ތަޖުރިބާ ލިބިގަނެ މަޢުލޫމާތު ޙިއްސާ ކުރުމުގެ ޕްރޮގްރާމެއްގައި ބައިވެރިވުމަށް ހަ ފުލުހަކު އިންޑޮނޭޝިޔާ އަށް ފުރައިފި އެވެ.
މި މަހުގެ 22-28 އަށް އިންޑޮނޭޝިޔާގައި ބާއްވާ ޕްރޮގްރާމުގައި މޯލްޑިވްސް ޕޮލިސް ސާވިސްގެ ފަރާތުން ބައިވެރި ވަނީ ޗީފް ސުޕްރިންޓެންޑެންޓް އޮފް ޕޮލިސް އަޙްމަދު ޝުހާދާއި އިންސްޕެކްޓަރު އޮފް ޕޮލިސް ފާޠިމަތު ނަޝްވާ އާއި ސަބް އިންސްޕެކްޓަރު އޮފް ޕޮލިސް ޢަދުނާން ޢަލީ އާއި ސަބް އިންސްޕެކްޓަރު އޮފް ޕޮލިސް މުޙައްމަދު ޞަބާޙުގެ އިތުރުން ޕޮލިސް ސްޓޭޝަން އިންސްޕެކްޓަރު ވަލީދު ސައީދާއި ޕޮލިސް ސްޓާފް ސާޖަންޓް އަބޫބަކުރު މުޙައްމަދެވެ.
މި ޕްރޮގްރާމުގައި ބައިވެރިވާ ފުލުހުން އިންޑޮނޭޝިޔާގައި ކޮމިއުނިޓީ ޕޮލިސް ކުރިޔަށް ގެންދާ ގޮތާއި އެކަމުގައި ހުރި ރަނގަޅު ކަންކަމާއި ހުރި ގޮންޖެހުންތައް ދެނެގަންނާނެ ކަމަށް ފުލުހުން ބުންޏެވެ.
މީގެ އިތުރުން ރާއްޖޭގައި ކޮމިއުނިޓީ ޕޮލިސިން ކުރިޔަށް ގެންދާ ގޮތުގެ މަޢުލޫމާތު ހިއްސާ ކުރަން ވެސް ހަމަޖެހިފައިވެ އެވެ.
މި ޕްރޮގްރާމުގައި ރާއްޖޭގެ އިތުރުން އޭޝިޔާގެ ބައެއް އެހެން ގައުމުތަކުން ވެސް ބައިވެރި ވާނެ އެވެ.