ސައިކަލްގައި ޓެކްސީ ކުރުމުގެ ހުއްދަ ދޭން ނިންމައިފި އެވެ.
މިކަން އިކޮނޮމިކް މިނިސްޓަރު މުހައްމަދު ސައީދާއި ޓްރާންސްޕޯޓް އޮތޯރިޓީގެ ޗެއާމަން އަބްދުއްރަޝީދު ނާފިޒް ވެސް ވަނީ ބައެއް މީޑިއާތަކަށް ކަށަވަރުކޮށް ދީފަ އެވެ.
މިނިސްޓްރީން ބުނެފައިވާ ގޮތުގައި ވެރި ރަށް މާލޭގައި ސައިކަލްގައި ޓެކްސީގެ ހިދުމަތް ދޭން ޝައުގުވެރިވާ ފަރާތްތަކަށް އަންނަ ހަފުތާގެ ތެރޭގައި ފުރުސަތު ހުޅުވައިލާނެ އެވެެ. އަދި އެ ފުރުސަތު ދޭނީ ކުންފުނިތަކަށް ކަމަށް ކަމާ ބެހޭ އިދާރާތަކުން ބުންޏެވެ.
ޓްރާންސްޕޯޓް އޮތޯރިޓީން ބުނީ ސައިކަލްގައި ޓެކްސީ ކުރުމުގެ ހުއްދަ ދިނުމަށް ކުރަން ޖެހޭ ކަންކަން އިންތިޒާމުކޮށް ދިނުމަށާއި އެކަމާ ބެހޭ އުސޫލުތައް އެކުލަވާލުމަށް ޓްރާންސްޕޯޓް އޮތޯރިޓީ އާ އިކޮނޮމިކް މިނިސްޓްރީން ހަވާލުކޮށްފައިވާ ކަމަށެވެ.
ނާފިޒު ވިދާޅުވީ ސައިކަލްގައި ޓެކްސީ ކުރުމުގެ ހުއްދަ ދިނުމަކީ މިހާރު ބައެއް ހާލަތްތަކުގައި ޓެކްސީ ނުލިބޭ ކަމަށް ބުނެ ލިބޭ ޝަކުވާތަކަށް ކޮންމެވެސް ވަރެއްގެ ހައްލެއް ލިބޭނެ ކަމަށް ބެލެވޭ ކަމެއް ކަމަށެވެ. އަދި ވިދާޅުވީ ސައިކަލްގައި ޓެކްސީ ކުރުމުގެ ހުއްދަ ދިން ނަމަވެސް މާލޭގެ ޓްރެފިކް އިތުރަށް ބޮޑުވެގެން ދާނެ ކަމަށް ގަބޫލުނުކުރައްވާ ކަމަށެވެ.
ސައިކަލްގައި ޓެކްސީ ކުރާ އިރު ފީއަކަށް ނަގާނީ 10ރ. އެވެ.
މާލެ ފިޔަވައި އެންމެ ގިނަ އަދަަދަކަށް އެއްގަމު އުޅަނދު ބޭނުން ކުރާ އައްޑޫގައި މިހާރު ވެސް އަމިއްލަ މީހަކު ސައިކަލްގައި ޓެކްސީގެ ހިދުމަތްދޭކަން ފާހަގަ ކުރެވެ އެވެ.
އެއީ މަޝްހޫރު މަރަދޫ ހަންބައްދާ ހަސަނެވެ. އޭނާގެ މޮބައިލަށް ގުޅާލުމުން، އެ މީހަކު ބުނާ ތަނަކަށް، ދާން ޖެހޭ ދުރު މިނަށް ބަލައި، އަގު ނަގައިގެން ސައިކަލްގައި ޓެކްސީކޮށް ދެ އެވެ.