ހުޅުމީދޫގައި ގާއިމުކޮށްފައިވާ ހައި ކޯޓުގެ ދެކުނު ގޮފީގެ ފަނޑިޔާރުންގެ ބެންޗްގައި ހިމެނިވަޑައިގެންނެވި ޑރ. އަޒްމިރަލްދާ ޒާހިރު ފަނޑިޔާރު ކަމުން އިސްތިއުފާ ދެއްވުމާ ގުޅިގެން އެ ހައި ކޯޓުގެ ފަނޑިޔާރު ސުޖާއު އުސްމާން ހައި ކޯޓުގެ ދެކުނު ގޮފީގެ ފަނޑިޔާރު ކަމަށް ހަމަޖައްސައިފި އެވެ.
އޭނާ ހައި ކޯޓުގެ ދެކުނު ގޮފީގެ ފަނޑިޔާރު ކަމަށް ހަމަޖެއްސެވީ ސުޕްރީމް ކޯޓުގެ ފަނޑިޔާރުންގެ މަޖިލީހުގެ އިއްތިފާގުންނެވެ.
މާލޭގައި ހުންނަ ހައި ކޯޓުގެ ފަނޑިޔާރު ކަމަށް ޑރ. އަޒްމިރަލްދާ އައްޔަން ކުރެއްވީ މާޗް 26، 2011 ގައެވެ. އޭނާ ހައި ކޯޓުގެ ދެކުނު ގޮފީގެ ފަނޑިޔާރު ކަމަށް އައްޔަންކުރެއްވީ ޖޫން، 22، 2015 ގަ އެވެ.
އަޒްމިރަލްދާ މަގާމުން އިސްތިއުފާ ދެއްވީ މި މަހުގެ 12 ވަނަ ދުވަހު އެވެ.
އޭނާ އިސްތިއުފާ ދެއްވި މައިގަނޑު ސަބަބަކީ މަގާމުގައި ދެމިހުރުމަށް ކަމާ ގުޅުން ހުރި ފަރާތްތަކުން ކޮށްދެއްވަން ޖެހޭ ކަންކަން ކޮށްދެއްވާފައި ނުވާތީ ކަމަށް އިސްތިއުފާގެ ސިޓީގައި ވިދާޅުވެފައިވެ އެވެ.
ހައި ކޯޓުގެ ދެކުނު ގޮފީގެ ފަނޑިޔާރު ކަމަށް މިއަދު އައްޔަން ކުރެއްވި ފަނޑިޔާރު ސުޖާއު އުސްމާންގެ އިތުރުން އެ ކޯޓުގެ ފަނޑިޔާރުންގެ ބެންޗްގައި މިހާރު ތިއްބެވީ ފަނޑިޔާރު އަބްދުލްޣަނީ މުހައްމަދާއި ފަނޑިޔާރު ޝުއައިބު ހުސައިން ޒަކަރިއްޔާ އެވެ.
ހައި ކޯޓުގެ ދެކުނު ގޮފީގެ އިސް ފަނޑިޔާރަކީ ފަނޑިޔާރު ޣަނީ އެވެ.
ސުޖާއު އުސްމާން ކްރިމިނަލް ކޯޓުގެ ފަނޑިޔާރު ކަމުގައި ހުންނަވަނިކޮށް އޭނާ ހައި ކޯޓުގެ ފަނޑިޔާރު ކަމަށް އައްޔަން ކުރެއްވީ މިދިޔަ ޖޫން މަހުގެ 8 ވަނަ ދުވަހު އެވެ.