ކޯޓުން ހުއްޓުވާލާފައިވާ ކުރީގެ "ހަވީރު" ނޫހުގައި މަސައްކަތް ކުރި ޓީމް ގުޅިގެން "މިހާރު" ގެ ނަމުގައި އުފެއްދި އާ ނޫހާއި ވެބްސައިޓް މިރޭ ލޯންޗްކޮށްފި އެވެ.
އެ ނޫސް ލޯންޗް ކުރުމާ ގުޅިގެން "މިހާރު" ގައި ބުނެފައި ވަނީ "މިހާރު" ނޫސް ނެރެ އަދި އޭގެ އެ ވެބްސައިޓް ކިއުންތެރިންނާ ހަމަ އަށް ގެނެސްދެވުނީ މާޗް 31، 2016 ގައި ސިވިލް ކޯޓުން ނެރުނު އަމުރަކާ ގުޅިގެން "ހަވީރު" ގެ މަސައްކަތް ވަގުތީ ގޮތުން ހުއްޓާލުމުން ކަމަށެވެ.
"އެ ދުވަހަށް ފަހު ހަވީރު މީޑިއާ ގްރޫޕްގެ މުވައްޒަފުންގެ ކުރިމަގާ މެދު ބޮޑެތި ސުވާލުތަކެއް އުފެދުނެވެ. ކިއުންތެރިންގެ މާޔޫސްކަން ބޮޑުވި އެވެ. ރާއްޖޭގެ ނޫސްވެރިކަމުގައި "ބާގަނޑެއް" އުފެދުނު ކަމަށް އެއް ބަޔަކު ގަބޫލުކުރި އެވެ. އަދި އެނބުރި ނޫސްވެރިކަމުގެ ތެރެއަށް ވަންނާނީ ކޮން އިރަކުންތޯ، ތެދުވެރި ކިއުންތެރިން އަހަމުން ދިޔަ އެވެ." މިހާރު ލޯންޗް ކުރުމާ އެކު އެ ނޫހުގެ އޮންލައިން އެޑިޝަންގައި ބުނެފައިވެ އެވެ.
އެ ޓީމުން ބުނީ އާ ނޫހެއް ވުޖޫދަަށް ގެންނަން ފާއިތުވި ދެ މަސް ދުވަހުގެ ތެރޭގައި "މިހާރު"ގެ އިނޮވޭޝަން ލެބްގެ މުވައްޒަފުން ވަރަށް ބުރަ މަސައްކަތްތަކެއްކޮށްފައިވާ ކަމަށެވެ. އަދި ލޭއައުޓް ޑިޒައިން އާއި ކޯޑިންގައި ގާތްގަނޑަކަށް ކޮންމެ ދުވަހަކު 16 ގަޑިއިރު ހޭދަ ކުރި ބުންޏެވެ.
"މިހާރު" ޓީމުން ބުނީ އަބަދު ވެސް މަސައްކަތް ކުރާނީ ވަކި ކޮޅަކަށް ނުޖެހި އިންސާފުވެރިކަމާއި ދެ ފުށް ފެންނަ ގޮތަށް ހަބަރު ފަތުރަން ކަމަށެވެ. އަދި އެ ގޮތުގައި "މިހާރު" ޓީމް ދެމިއޮންނާނެ ކަމުގެ ޔަގީންކަން ވަނީ ދީފަ އެވެ.
"މިދިއަ ދެ މަސް ދުވަހުގެ ތެރޭގައި ރާއްޖޭގެ ނޫސްވެރިކަމުގެ ބައެއް އުނިވުމުގެ ޝަކުވާތަކެއް ގިނަ އަދަދެއްގެ ކިއުންތެރިން ސޯޝަލް މީޑިއާގައި ފާޅުކޮށްފައިވެ އެވެ." މިހާރު ނޫހުން ބުންޏެވެ. "މިހާރުގެ ނޫސްވެރިންނަށް މިއަދު ލިބޭ އެންމެ ބޮޑު އެއް ހިތްވަރަކީ އެ އުނިކަން ފިލުވައިދޭން ކިއުންތެރިން ކުރާ އުއްމީދާ ހަމައަށް ވާސިލްވުމެވެ.