ސާފެސް އާރްޓީ ނެރުމަށް ފަހު މައިކްރޯސޮފްޓުން ވަނީ ދުނިޔޭގެ ޓެބްލެޓް މާކެޓަށް ވަދެފަ އެވެ. އެމީހުންގެ ފުރަތަމަ ޓެބްލެޓް ދުނިޔޭގެ މަޝްހޫރު ޓެބްލެޓް ތަކާއި ވަނީ ވާދަ ކޮށްފަ އެވެ. ކުރިއަށް އޮތް ފެބްރުއަރީގައި މައިކްރޯސޮފްޓުން ދަނީ ސާފެސް ޕްރޯ ނަމަކަށް ކިޔާ ޓެބްލެޓެއް ނެރެން ތައްޔާރު ވަމުންނެވެ. ތަޖުރިބާކާރުން ބުނަނީ މި ޓެބްލެޓާއި އަޅާ ކިޔޭނެ އެއްވެސް ޓެބްލެޓެއް މިހާރު މާކެޓުގައި ނެތް ކަމަށެވެ.
ސާފެސް ޕްރޯ އަކީ އެހެން ޓެބްލެޓާއި ހިލާފަށް އިންޓެލް i5 ޕްރޮސެސާއެއްގެ އިތުރުން 4 ޖީބީ ރެމް ބޭނުން ކުރާ ޓެބްލެޓެކެވެ. އެހެން ކަމުން މި ޓެބްލެޓްގައި ވިންޑޯސް 8 ބޭނުން ކުރެވޭނެ އެވެ. އަދި ފޮޓޯޝޮޕް އާއި މައިކްރޯސޮފްޓް އޮފިސް ފަދަ ޕްރޮގްރާމްތައް އިންސްޓޯލް ކުރެވޭނެ އެވެ. ކުރުކޮށް ދަންނަވަނީ ނަމަ ކޮމްޕިއުޓަރެއްގައި ބޭނުން ކުރާ ކޮންމެ ސޮފްޓްވެއާ އެއް ބޭނުން ކުރެވޭނެ އެވެ.
މި ޓެބްލެޓްގައި ޔޫއެސްބީ 3.0 ދެ ޕޯޓްގެ އިތުރަށް މައިކްރޯ އެސްޑީ ސްލޮޓަކާއި ޑިސްޕްލޭ ޕޯޓެއް އަދި ހެޑްސެޓް ޖަހާނެ ޕޯޓެއް ވެސް ހުރެ އެވެ. ސާފެސް ޕްރޯ އަށް ޔޫއެސްބީ ކޮންމެ ޑިވައިސް އެއްވެސް ގުޅާލެވެ އެވެ. ފަސޭހަ ކަމާއި އެކު އައިޕެޑާއި ފޯނު ޗާޖް ކޮށް ސިންކް ކުރެވެ އެވެ. މައުސް، ކީބޯޑް، ސްޕީކަރު އަދި ޕްރިންޓަރު ވެސް މި ޓެބްލެޓަށް ގުޅާލެވެ އެވެ.
މައިކްރޯސޮފްޓުން ހާމަ ކޮށްފައިވާ އަގުތަކަށް ބަލާއިރު ސާފެސް ޕްރޯގެ 128 ޖީބީ މޮޑެލް އެއް ލިބެނީ 999 ޑޮލަރަށެވެ. ފަހުގެ އެޕަލް އައިޕެޑެއް 829 ޑޮލަރަށް ލިބޭ އިރު މި އަގަކީ މާކަ ބޮޑު އަގެއް ނޫނެވެ. ކޮންމެއަކަސް ފުލް ވިންޑޯސް ޓެބްލެޓެއް ބޭނުންވާ ކޮންމެ މީހަކަށް މިއީ ވަރަށް އުފާވެރި ޙަބަރެކެވެ.