ރާއްޖޭގެ ހުރިހާ ރަށަކުން ޓީމް ބައިވެރިކޮށްގެން ފުޓްސަލް މުބާރާތެއް "ގޯލްޑެން ފުޓްސަލް ޗެލެންޖް 2016" ގެ ނަމުގައި މުބާރާތެއް ބާއްވަން ނިންމައި އެ މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.
ޗެމްޕއަން ޓީމަށް 50،000ރ. ހުށަހަޅައި އަދި މުބާރާތުގެ ހުރިހާ މެޗެއް މާލޭގައި ކުޅެން ހަމަޖެހިފައިވާ މުބާރާތުގައި ބައިވެރިވުމުގެ ފުރުސަތު މި މަހުގެ 29 އާ ހަމައަށް ވަނީ ހުޅުވާލައިފަ އެވެ.
މުބާރާތުގައި ބައިވެރިވާން ކޮންމެ ޓީމަކުން 4،000ރ. ގެ ފީއެއް ދައްކަން ޖެހެ އެވެ.
މުބާރާތުގައި ބައިވެރިވާން ރަޖިސްޓްރީ ކުރަން ގުޅަން ޖެހޭ ނަމްބަރަކީ 9994470 ކަމަށް ގޯލްޑަން ފުޓްސަލް އެސޯސިއޭޝަނުން ބުންޏެވެ.
މުބާރާތުގައި ރާއްޖޭގެ ކޮންމެ ރަށަކުން ޓީމެއް ބައިވެރި އެއް ޓީމް ބައިވެރި ކުރެވޭ އިރު ފުވައްމުލަކުގެ ކޮންމެ އަވަށަކަށް ޓީމެއް ބައިވެރި ކުރުމުގެ ފުރުސަތު ވެސް ވަނީ ހުޅުވާލައިފަ އެވެ. އަދި ކޮންމެ ރަށެއްގެ ޓީމަކަށް ވެސް ކުޅެވޭނީ އެ ރަށެއްގެ ރަޖިސްޓަރީގައި ހިމެނޭ ކުޅުންތެރިންނަށް އެކަންޏެވެ.
"ގޯލްޑެން ފުޓްސަލް ޗެލެންޖް 2016" ކުރިއަށް ގެންދަން ނިންމާފައިވާ ގޮތަށް ބަލާ އިރު އެ މުބާރާތުގެ ފުރަތަމަ ބުރު ކުރިއަށް ދާނީ ކޮންމެ އެތޮޅެއް ވަކި ގްރޫޕެއްގެ ގޮތުގައި ބަލައި، ގްރޫޕުގައި ހިމެނޭ ކޮންމެ ޓީމެއް ކޮންމެ ޓީމަކާ ކުޅެ، އެންމެ ގިނަ ޕޮއިންޓް ހޯދާ ޓީމެއް އަތޮޅު ޗެމްޕިއަނުންގެ ގޮތުގައި ދެވަނަ ބުރަށް ދަތުރުކުރާ ގޮތަށެވެ.
އަދި މާލޭގެ އަވަށްތައް ވަކި ގްރޫޕެއްގެ ގޮތުގައި ބަލައި، ގްރޫޕުގެ ކޮންމެ ޓީމެއް ކޮންމެ ޓީމަކާ ކުޅެ، އެންމެ ގިނަ ޕޮއިންޓް ހޯދާ ޓީމެއް އަވަށު ޗެމްޕިއަނުންގެ ގޮތުގައި ދެވަނަ ބުރަށް ދަތުރު ކުރާ ގޮތަށް ކަމަށް ގޯލްޑެން ފުޓްސަން އެސޯސިއޭޝަނުން ބުންޏެވެ.
ދެވަނަ ބުރު ކުރިއަށް ގެންދާނީ ޓީމްތައް އަށް ޒޯނަށް ބަހައި، އެ ޒޯނެއްގައި ހިމެނޭ ޓީމުތައް ކޮންމެ ޓީމެއް ކޮންމެ ޓީމަކާ ކުޅެ، އެންމެ ގިނަ ޕޮއިންޓް ހޯދާ ޓީމެއް ޒޯން ޗެމްޕިއަނުންގެ ގޮތުގައި ކުއާޓާ ފައިނަލަށް ދަތުރު ކުރާ ގޮތަށެވެ.
މުބާރާތް ފަށަން ހަމަޖެހިފައި ވަނީ އޮކްޓޯބަރު މަހުގެ 1 ވަނަ ދުވަހު އެވެ. އަދި މުބާރާތް އެ މަހުގެ 30 އާ ހަމައަށް ކުރިއަށް ދާނެ އެވެ.