ފުލުހުންނަށް ހުށަހަޅާ ޖިނާއީ މައްސަލަތަކާ ގުޅޭ ގޮތުން އަދި މައްސަލައިގެ ތަހުގީގު ކުރިއަށް ދާ ގޮތް އެސްއެމްއެސް މެދުވެރިކޮށް ލިބޭނެ އިންތިޒާމު ފުލުހުން ހަމަޖައްސައިފި އެވެ.
އިއްޔެ ފެށިގެން މި އިންތިޒާމު ހަމަޖައްސާފައިވުމާ އެކު ފުލުހުންނަށް ހުށަހެޅޭ މައްސަލަތައް ހުށަހެޅުމާ އެކު އެ މައްސަލައިގެ އިންސިޑެންޓް ލޮގް ކުރެވުނުކަން އެސްއެމްއެސްއެއް މެދުވެރިކޮށް، މައްސަލަ ހުށަހަޅާ ފަރާތަށް އެނގިގެން ދާނެ އެވެ.
މީގެ އިތުރުން މައްސަލަ ކޭސްކޮށް މައްސަލަ ބެލުމަށް ކަނޑައެޅޭ އިންވެސްޓިގޭޝަން އޮފިސަރުގެ މައުލޫމާތާއި މައްސަލަ ތަޙްޤީޤު ކުރާ އިންވެސްޓިގޭޝަން އޮފިސަރާއި ގުޅޭނެ ނަމްބަރު އަދި މައްސަލައިގެ ކޭސް ނަމްބަރު، އެ މައްސަލަ ކޭސް ކުރާ ހިސާބުން، ހަމަ ކުރިން ދެންނެވުނު ބީދައިން ހުށަހަޅާ ފަރާތަށް އެންގޭނެ ކަމަށް ފުލުހުން ބުންޏެވެ.
އަދި ހުށަހެޅިފައިވާ މައްސަލައެއްގެ ތަހުގީގު ނިންމައި ޕްރޮސެކިއުޓް ކުރަން ފޮނުވުމުން ނުވަތަ ދައުވާ ކުރެވޭ ވަރަށް ހެކި ނުލިބުމުގެ ސަބަބުން ފައިލް ކުރުމުން ވެސް އެ މައްސަލަ ހުށަހަޅާ ފަރާތަށް އެ މައުލުމާތު އެސްއެމްއެސް މެދުވެރިކޮށް އަންގާނެ އެވެ.
ފުލުހުން ބުނީ މި ހިދުމަތް ތަޢާރަފް ކުރެވިގެން ދިއުމުން ޢާއްމު ރައްޔިތުންނަށް ބޮޑު ފަސޭހައެއް ލިބިގެން ދާނެ ކަމަށެވެ.
ވަކިން ޚާާއްޞަކޮށް ފުލުހުންނަށް ހުށަހެޅޭ މައްސަލަތައް ކުރިޔަށްދާ ގޮތުގެ މަޢުލޫމާތު މައްސަލަ ހުށަހަޅާ ފަރާތަށް ފަސޭހަ ކަމާ އެކު ލިބިގެން ދިއުމުގެ ފުރުޞަތު ތަނަވަސްވެގެން ދާނެ ކަމަށް ފުލުހުން ބުނެ އެވެ.