މަރަދޫ ގޯދިއްޔާ ޖަމިއްޔާ އިން އިންތިޒާމްކޮށްގެން މި އަހަރު ބާއްވާ ގޯދިއްޔާ ފުޓްސަލް ކަޕް 2016 ގައި ވާދަ ކުރާ ކޮންމެ ޓީމަކަށް އައްޑޫ ސިޓީ ކައުންސިލްގެ ފަރާތުން 10،000ރ. ގެ ފައިސާގެ އެހީއެއް ދީފި އެވެ.
މުބާރާތުގައި މި ފަހަރު ވެސް 20 ޓީމް ވާދަ ކުރެ އެވެ. ޓީމްތަކާ ފައިސާ ހަވާލު ކުރަން މިއަދު ކައުންސިލް އިދާރާގައި ބޭއްވި ކުޑަކުޑަ ހަފުލާއެއްގައި، ޓީމްތަކާ ފައިސާ ހަވާލުކޮށް ދެއްވީ މޭޔަރު އަބްދުﷲ ސޯދިގް (ސޯބެ) އެވެ.
ކޮންމެ އަހަރެއްގެ ރޯދަ މަހު ގޯދިއްޔާ އިން ބާއްވަމުން އަންނަ މި އަހަރުގެ މުބާރާތް ފަށާނީ މި މަހުގެ 12 ގަ އެވެ.
މުބާރާތުގެ މި ފަހަރު ޓައިޓްލް ސްޕޮންސަރަކީ ބެޓީ ކްރޮކާ އެވެ.
ކޯ ސްޕޮންސަރުކަން އެސްޓީއޯ އިން ނަގާފައިވާ އިރު، ޓެލްކޮމް ޕާޓްނަރަކީ ދިރާގެވެ. އޮފިޝަލް ޑްރިންކަކީ އެޕިކް އެނާޖީ ޑްރިންކެވެ.
ގޯދިއްޔާ އިން ބުނީ މި އަހަރުގެ މުބާރާތުގެ ޓްރެވެލް ޕާޓްނަރަކީ މަރަދޫފޭދޫ އެކްސްކްލޫސިވް ކަމަަށެވެ. އަދި މުބާރާތުގެ ބްރޯޑްކާސްޓިން ޕާޓްނަރަކީ ޕީއެސްއެމްގެ ޔެސް ޓީވީ އެވެ.
އަންނަ މަހުގެ 5 ވަނަ ދުވަހާ ހަމައަށް ކުރިއަށް ގެންދާ މުބާރާތުގެ މެޗްތައް މި ފަހަރު ކުޅޭނީ ހިތަދޫ ފަލަކް އިން ހަދިޔާކޮށްފައިވާ ނައިކް ފުޓްބޯލްސް މެނޯ އިންނެވެ.
ޗެމްޕިއަން ޓީމަށް 65،000ރ. ހުށަހަޅާފައިވާ މުބާރާތުގައި 20 ޓީމް ވާދަ ކުރާ އިރު، ރޭގަނޑު މެޗްތައް ކުޅޭ މުބާރާތުގައި ޖުމްލަ 47 މެޗް ކުޅޭނެ އެވެ. މުބާރާތުގައި ޖުމްލަ 280 ކުޅުންތެރިންގެ ހުނަރު ފެނިގެން ދާނެ އެވެ.
ގޯދިއްޔާ ފުޓަސަލް ކަޕް 2016 ވެސް ކުރިއަށް ދާނީ މަރަދޫ ވެންބޮޅަފިޝި ސްޓޭޑިއަމްގަ އެވެ.