ޔުއެފޭ ޔޫރޯ 2016 ފެށެން ހަފްތާއަކަށް ވުރެ މަދު ދުވަސްކޮޅެއް ބާކީ އޮއްވައި ޕްރިމިއާ ލީގުގެ ބޮޑެތި ޓީމުތަކުން ޔޫރޯގެ ކުރިން ޔޫރަޕުގައި ވިދާފައިވާ ކުޅުންތެރިން ގެނައުމަށް ބޮޑެތި މަސައްކަތްތަކެއް ކުރަން ފަށައިފި އެވެ.
ޖަރުމަނުވިލާތު އަދި ބޮރޫޝިއާ ޑޯޓުމަންޑަށް ކުޅެމުން އައި އިކޭ ގުންޑޯގަން މެންޗެސްޓާ ސިޓީ އިން މި ޓްރާންސްފާ ވިންޑޯގައި ގެނައި ފުރަތަމަ ކުޅުންތެރިޔަކަށް ހަދާފައިވާ އިރު އަވަށްޓެރި ޔުނައިޓެޑުން ސްވިޑެންގެ ކެޕްޓެއިން ޒަލްޓަން އިބްރަހިމޮވިޗް ގެންނަން އުޅޭ ހަބަރު ވަނީ އިންތިހާ އަށް ގަދަވެ ފައެވެ.
ޔޫރޯގެ ފެށުމުގެ ކުރިން އިބްރާގެ ކުލަބަށް ސޮއިކޮށް ކުރަން ޖެހޭ ހުރިހާ ކަމެއް ނިންމުމަށް ޔުނައިޓެޑުން މަސައްކަތް ކުރަމުންދާ އިރު އޭނާއާ ދެ ކުލަބާ ދޭތެރޭ ނިންމަން ޖެހޭ ހުރިހާ ކަމެއް މިހާރު ވަނީ ނިންމާފައި ކަމަށް ސްކައި ސްޕޯޓްސް އިން ރޭ ވަނީ ރިޕޯޓްފަ އެވެ
.ޔުނައިޓެޑާ އިބްރާގެ ވާހަކައަށް ފަހު ދެން އެންމެ ގަދައަށް ދެކެވެން ފެށީ މިސީޒަނުގައި ޕްރިމިއާ ލީގު ނެގި ލެސްޓާ ސިޓީގެ ތަރި ޖޭމީ ވާޑީ އާސެނަލް އަށް އަންނަން އުޅޭ ހަބަރެވެ.
ވާޑީގެ ރިލީސް ކޯސް 20 މިލިއަން ޕައުންޑަށް އާސެނަލް އިން މިހާރު އެއްބަސް ވެފައިވާ އިރު ލިވަޕޫލް އިން ވަނީ އޭނާ އަށް ހަފްތާއަކު 140 ހާސް ޕައުން ދިނުމަށް ހުށަހަޅައިފަ އެވެ.
ނަމަވެސް ލިވަޕޫލް ޔޫރަޕުގައި އަންނަ ސީޒަނުގައި ކުޅުމުގެ ފުރުސަތެއް ނެތިފައި، އާސެނަލް ޗެމްޕިއަންސް ލީގަށް ކޮލިފައިވެފައިވާ އިރު، ބޮޑަށް ބެލެވެނީ އޭނާ ދާނީ އާސެނަލް އަށް ކަމަށެވެ.
ނަމަވެސް އަދި ވާޑީ ކުލަބު ދޫކޮށް ދިއުމުގެ އެއްވެސް ނިޝާނެއް ދައްކައިފައެއް ނުވެ އެވެ.