ލޮނާ ނުލައި ކާ އެއްޗެހި ސުލްހަ ނުވާނެކަން އެންމެން ވެސް ދަނެ އެވެ. އެކަމަކު މާ ލޮނު ގަދަކޮށް ކާން ނަހަދާށެވެ.
ޖަންކް ފުޑްތަކުގެ ތެރޭގައި ހިމެނޭ ބާގާ އާއި ޕޮޓޭޓޯ ޗިޕްސް ފަދަ ތަކެއްޗަކީ ލޮނު ވަރަށް ގިނަ އަދަދަކަށް އެކުލެވިގެންވާ ބާވަތްތަކެވެ.
އެހެންވެ ވީހާ ވެސް ބޮޑަށް އެފަދަ ކާ ތަކެއްޗާ ދުރުވާށެވެ.
ތަޖުރިބާކާރުން ބުނަނީ މާ ގިނައިން ލޮނު ބޭނުން ކުރުމަކީ ސިއްހަތަށް ނުރައްކާތެރި ކަމެއް ކަމަށެވެ.
އެގޮތުން މާ ގިނައިން ލޮނު ބޭނުން ކުރެވޭ ނަމަ، ލޭގެ ޕްރެޝަރު މަތިވާ ކަމަށް ސިއްހީ ތަޖުރިބާކާރުން އަންނަނީ ބުނަމުންނެވެ. އެހެންވެ ލޭ މަތި ނުވެ، ލޭގެ ޕްރެޝަރު ކޮންޓްރޯލް މިންވަރެއްގައި ހިފަހެއްޓުމަށް ލޮނު ބޭނުން ކުރާ މިންވަރު ދަށް ކުރަން ޖެހެ އެވެ.
ހިތުގެ މައްސަލަތައް ހުންނަ މީހުން ވެސް ލޮނު ގަދަކޮށް ނުކާށެވެ. އެއީ ހިތަށް ސިއްހީ ގޮތުން އިތުރަށް މައްސަލަތައް ކުރިމަތި ކުރުވާނެ ކަމެކެވެ.
މާ ގިނައިން ލޮނު ބޭނުން ކުރެވޭ ނަމަ ހަށިގަނޑުން ފެން މަދުވުން ފަދަ މައްސަލަތަކާ ވެސް ކުރިމަތިލާން ޖެހޭނެ އެވެ.
ޑޮކްޓަރުން އަބަދު ވެސް އިރުޝާދު ދެނީ ދުވާލެއްގެ މައްޗަށް މަދުވެގެން އަށް ތަށި ފެން ބޯށެވެ. މާ ލޮނު ގަދަކޮށް ކެވޭ ނަމަ، ފެން ބޯން ޖެހޭ މިންވަރު އިތުރު ކުރަން ޖެހޭނެ އެވެ.