އައްޑޫ ސިޓީގެ ދެ އަވަށެއްގެ ދެ ސުކޫލެއްގައި އިތުރު އިމާރާތްތަކެއް އަޅައި އަޕްގްރޭޑު ކުރުމަށް އަމީން ކޮންސްޓްރަކްޝަނާ މިނިސްޓްރީ އޮފް އެޑިޔުކޭޝަނުން 32.9 މިލިޔަން ރުފިޔާގެ ކޮންޓުރެކްޓެއްގައި މިއަދު ހަވާލުކޮށްފި އެވެ.
މިއަދު މިނިސްޓްރީން ބޭއްވި ރަސްމިއްޔާތެއްގައި އަމީން ކޮންސްޓަރަކްޝަނާއި ހަވާލުކޮށްފައި ވަނީ ފޭދޫ އަވަށުގެ ފޭދޫ ސްކޫލުގައި 12 ކުލާސްރޫމާއި ހޯލެއް އިމާރާތް ކުރުމަށާއި ހުޅުމީދޫގެ ސ. އަތޮޅު މަދަރުސާގައި ލައިބްރަރީ އަކާއި އޮފީސް އިމާރާތެއްގެ އިތުރުން ހަތަރު ކުލާސްރޫމް އަޅާ ނިންމުމަށެވެ.
މިރަސްމިއްޔާތުގައި މިނިސްޓްރީގެ ފަރާތުން އެ އެއްބަސްވުމުގައި ސޮއި ކޮށްފައިވަނީ ސީނިއާ އެގްސެކެޓިވް އިބްރާހިމް އިސްމާއީލެވެ.
އަމީން ކޮންސްޓްރަކްޝަނުގެ ފަރާތުން އެއްބަސްވުމުގައި ސޮއިކޮށްފައިވަނީ އެ ކުންފުނީގެ މެނޭޖިިންގ ޑައިރެކްޓަރު އަބްދުﷲ މުހައްމަދެވެ.
މިނިސްޓްރީން އެ ކުންފުންޏާ ހަވާލުކޮށްފައިވާ އެއްބަސްވުމުގައި ވާގޮތުން ސ. އަތޮޅު މަދަރުސާގައި އަޅަން ޖެހޭ އިމާރާތްތައް އަޅާ 300 ދުވަހުގެ ތެރޭގައި ނިންމަން ޖެހޭނެ އެވެ.
މި މަސައްކަތްތައް ނިންމުމަށް 10.7 މިލިޔަން ރުފިޔާ މިނިސްޓްރީން ވަނީ ކުންފުންޏާ ހަވާލުކޮށްފަ އެވެ.
ފޭދޫ ސުކޫލުގެ އިމާރާތްތައް އަޅާ ނިންމުމަށް އަހަރެއްގެ މުއްދަތު ދީފައިވާ އިރު މަސައްކަތުގެ ހުރިހާ ކަމެއް ނިންމުމަށް 22.2 މިލިޔަން ރުފިޔާ ވަނީ ހަވާލުކޮށްފައެވެ.
އަމީން ކޮންސްޓްރަކްޝަނުގެ ފަރާތުން ވާހަކަ ދައްކަވަމުން ކުންފުނީގެ މެނޭޖިން ޑިރެކްޓަރ ބުނެފައި ވަނީ މިނިސްޓްރީން ހަވާލުކުރި މުއްދަތުގައި މަސައްކަތުގެ ހުރިހާ ކަމެއް ނިމި ސުކޫލުގެ ކުދިންނާއި މުވައްޒިފުންނަށް ބޭނުން ކުރެވޭނެ ކަމުގެ ޔަގީންކަން އަރުވާ ކަމަށެވެ.
ނަމަވެސް މިމުއްދަތަށް މަސައްކަތް ކޮށް ނިންމުމަށް ކަމާބެހޭ ހުރިހާ އެންމެންގެ އެއްބާރުލުން ބޭނުންވާނެ ކަމަށް އަބްދުﷲ ވަނީ އިތުރުކޮށްފަ އެވެ.
ހުޅުމީދޫގައި ގްރޭޑް 7-12 އަށް ކިޔަވައިދޭ އަތޮޅު މަދަރުސާގެ ދަރިވަރުންނަށް މިއީ ލިބުނު ވަރަށް ބޮޑު އުފަލެކެވެ.
ރަނގަޅު ލައިބްރަރީއެއް ނެތުމަކީ އެސުކޫލު ކުދިން ގިނަ ދުވަސްތަކެއްވަންދެން ތަހައްމަލު ކުރަމުން އައި ދަތިކަމެކެވެ. އަތޮޅު މަދުރަސާއަކީ 209 ދަރިވަރަކު ތައުލީމު ހާސިލު ކުރަމުން އަންނަ ސުކޫލެކެވެ.
ގްރޭޑް 1-10 އަށް ކިޔަވައިދޭ ފޭދޫ ސުކޫލުގެ ދަރިވަރުންނަށާއި މުވައްޒިފުންނަށްވެސް މި މަސައްކަތް ނިމޭއިރު ގިނަ ދުވަސްތަކެއް ވަންދެން ދެކެމުން އަންނަ ހުވަފެން ހަގީގަތަކަށް ވެގެންދާނެއެވެ. މިއީ މިހާރު ޖުމުލަ 520 ދަރިވަރުން ތައުލީމު ހާސިލު ކުރަމުން އަންނަ ސުކޫލެކެވެ.
އައްޑޫ ސިޓީގައި މަތީ ސާނަވީ ތައުލީމު އެންމެ ގިނަ ދަރިވަރަކު އުނގެނެމުން އަންނަ ރާއްޖެއަށް ފަޚުރުވެރި ވަނަތަކެއް ގެނެސްދީފައިވާ އައްޑޫ ހައި ސުކޫލުގައި އަދިވެސް ހޯލެއް ނެތުމަކީ އެސުކޫލުގައި ތައުލީމު ހާސިލުކުރާ އެންމެހާ ދަރިވަރުންނާއި މަސައްކަތް ކުރާ އެންމެހާ މުދައްރިސުން ނުހަނު ގިނަ ތަކުލީފުތަކެއް އުފުއްލަން ޖެހޭ ކަމެކެވެ.
ސުކޫލުގެ ބޮޑު ހަފްލާއެއް ބާއްވަން ޖެހުނުނަމަވެސް މޫސުން ތަން ނުދޭކަމުގައި ވާނަމަ އެ ހަފްލާ އެހެން ސުކޫލެއްގައި ބާއްވަން ޖެހުމަކީ ކައިރި މާޒީގައި ސުކޫލުން ކަން ކުރަމުން އަންނަ ގޮތެވެ.
މިނިސްޓްރީގެ ފަރާތުން އައްޑޫ ހައި ސްކޫލަށް ފެންވަރު ރަނގަޅު ހޯލެއް އަޅާ ދިނުމަކީ މިވަގުތު ސްކޫލުގައި ކިޔަވަމުންދާ އެންމެހާ ދަރިވަރުންގެ އެންމެ ބޮޑު އެދުންކަމުގައިވުމަކީ ޝައްކެއް އޮތް ކަމެއް ނޫނެވެ.