ހިތަދޫގެ މިސްކިތްތަކުން ހަތިމާއި ޤުރުއާނުގެ ދިވެހި ތަރުޖަމާ ވަަގަށް ނަގާ މައްސަލަ ބޮޑުވެގެން މިކަން ފުލުހުންނާއި އިސްލާމިކް މިނިސްޓްރީގެ ސަމާލު ކަމަށް ގެނެސްފި އެވެ.
ހިތަދޫން ވާހަކަ ދެއްކި މީހަކު ބުނި ގޮތުގައި އެ އަވަށުގެ އެކި މިސްކިތްތަކުން ހަތިމު ވަގަށް ނަގަނީ ސީދާ ކޮން ބައެއް ކަމެއް ނޭނގެ އެެވެ.
މިސްކިތްތަކުގައި ކުރިން ބޭނުންކޮށްފައި ހުރި ހަތިމްތަކާއި ބޭނުން ނުކޮށް އާކޮށް ހުރި ގިނަ އަަދަދެއްގެ ހަތިމްތައް އެކި މިސްކިތްތަކުން އެކި ފަހަރުމަތިން މިހާތަނަށް ވަގަށް ނަގާފައިވާ އެވެ.
ހިތަދޫން ވާހަކަ ދެއްކި އެހެން މީހަކު ބުނި ގޮތުގައި މިހާތަނަށް އެންމެ ގިނަ އަދަދަކަށް ހަތިމް ވަގަށް ނަގާފައި ވަނީ އެ އަވަށު މަސްޖިދުލް އުމަރުލް ފާރޫގް މިސްކިތުންނެވެ.
"ރަމަޟާން މަހާ ކުރިމަތިލާން ތައްޔާރު ވަނިކޮށް މިސްކިތްތަކުން ހަތިމް ވަގަށް ނެގުމަކީ ވަރަށް ދެރަވަރުގެ ވަރަށް ހިތާމަ ހުރި ކަމެއް. އަދި މިއީ ވަރަށް ކަންބޮޑުވާ ކަމެއް،" އޭނާ ބުންޏެެވެ. "މި މައްސަލަ ކަމާ ބެހޭ ފަރާތްތަކުން ބަލަން ޖެހޭނެ."
މިކަމާ ބެހޭ ގޮތުން އައްޑޫގައި ހުންނަވާ އިސްލާމިކް މިނިސްޓްރީގެ ކޯޑިނޭޓަރު ހިޝާމް އަހުމަދުގެ ބަހެއް ކުރި މަސައްކަތް އަދި ކާމިޔާބުވާ ގޮތެއް ނުވެ އެވެ.
ފުލުހުން ބުނީ މިސްކިތުން ހަތިމް ވަގަށް ނަގާ މައްސަލަ ރިޕޯޓްކޮށްފައިވާތީ އެ މައްސަލަ ބަލަމުން އަންނަ ކަމަށެވެ.