ކުރިއަށް އޮތް އެމެރިކާގެ ރިޔާސީ އިންތިހާބަށް ވާދަ ކުރާ ޑޮނަލްޑް ޓްރަމްގެ ކާޓޫން ފޮޓޯ އާ އެކު ޗައިނާ އިން އުފެއްދި ޓޮއިލެޓް ޕޭޕަރަށް އެމެރިކާ އިން ވެސް ބޮޑު ތަރުހީބެއް ލިބެމުން އަންނަ ކަަަމަށް މީޑިއާ ރިޕޯޓްތައް ބުނެފި އެވެ.
ޒިންހުއާ ނިއުސް އެޖެންސީން ރިޕޯޓްކޮށްފައިވާ ގޮތުގައި ޓްރަމްޕްގެ މޫނަށް ގެންނަ ތަފާތު އެކްސްޕްރެޝަންތަކާ އެކު އުފައްދާފައިވާ ޓޮއިލެޓް ޕޭޕަރަށް ލިބެން ފެށި ތަރުހީބާ އެކު ޗައިނާގެ ވަރަަށް ގިނަ ކުންފުނިތަކުން މިހާރު އެ ޓޮއިލެޓް ޕޭޕަރު އުފައްދަން ވަނީ ފަށައިފަ އެވެ.
ގިންގްޑާއޯ ވޯލްޕޭޕާ އިންޑަސްޓްރިއަލް ކޮމްޕެނީން އުފެއްދި ޓޮއިލެޓް ޕޭޕަރުގައި ސްލޯގަންއެއްގެ ގޮތުގައި ހިމަނާފައި ވަނީ "ޑަމްޕް ދަ ޓްރަމްޕް" އެވެ.
މީޑިއާ ރިޕޯޓްތައް ބުނާ ގޮތުން މި ޓޮއިލެޓް ޕޭޕަރު މާކެޓަށް ނިކުތުމާ އެކު، ޓްރަމްޕާ އިދިކޮޅު ފަރާތްތަކުގެ ތަރުހީބު ވަަރަށް ބޮޑަށް ވަނީ ލިބެން ފަަށައިފަ އެވެ.
މި ޓޮއިލެޓް ޕޭޕަރު ޗައިނާގެ އޮންލައިން ވިޔަފާރި ޕޯޓަލް އަލީބާބާ އާއި މަޝްހޫރު އެމޭޒަންގައި ވެސް އަންނަނީ ވަަރަށް ގަދަ އަށް ވިކެމުންނެވެ.
އެގޮތުން އޭނާގެ ސިޔާސަތުތަކާ ދެކޮޅު ފަރާތްތަކުން މިހާރު އަންނަނީ، ޓްރަމްޕަށް އިހުތިރާމެއް އެއްގޮތަކަށް ވެސް ނެތްކަން ދެއްކުމުގެ ގޮތުން މި ޓޮއިލެޓް ޕޭޕަރު މިހާރު ބޭނުން ކުރަމުންނެވެ.
ރިޕަބްލިކަން ޕާޓީގެ ކެންޑިޑޭޓް ޓްރަމްޕަށް ގިނަ ބަޔަކު ނަފުރަތު ކުރާ އެއް ސަބަބަކީ މުސްލިމުންނާ ދެކޮޅަށް އޭނާ ގެންގުޅޭ ހަރުކަށި ސިޔާސަތުގެ ސަބަބުންނެވެ.
އޭނާ ބުނެފައިވާ ގޮތުގައި އެމެރިކާގެ ރައީސްކަން ލިބިއްޖެ ނަމަ މުސްލިމުންނަށް އެމެރިކާ އަށް އެތެރެވާން ފުރުސަތެއް އޭނާގެ ސަރުކާރަކުން ނުދޭނެ އެވެ.