އެމެރިކާގައި ކުރިއަށްދާ ކޮޕަ އެމެރިކާ 2016 ގައި އާޖެންޓީނާ އަދި ޗިލީ ކުޅުނު މެޗު އާޖެންޓީނާ ކާމިޔާބުކޮށް ފިއެވެ.
ގްރޫޕް ސްޓޭޖުގައި އާޖެންޓީނާ އަށް އޮތް އެންމެ އުނދަގޫ މެޗުގައި ޗިލީ އާ ދެކޮޅަށް ކުޅެ މޮޅުވުމަކީ ކުރިއަށް ދިއުމަށާއި މުބާރާތް ކާމިޔާބު ކުރުމަށް ލިބޭނެ ވަރަށް ބޮޑު ހިތްވަރެކެވެ.
ޕީއެސްޖީގެ ފޯވާޑް އެންގެލް ޑިމަރިއާ ރޭގައި އާޖެންޓީނާ އިން ވިދާލި އިރު ރޭގެ މެޗް އާޖެންޓީނާ އިން ކުޅުނީ ކެޕްޓަން މެސީ އާ ނުލަ އެވެ.
މެސީގެ ބައިވެރިވުމާ ނުލައި އާޖެންޓީނާ ކުޅުނު މެޗުގައި އެންމެ ބޮޑު ބައެއް ކުޅެފައިވަނީ ޑިމަރިއާ އެވެ.
މެޗުގެ ކުރިން ރޭ ޑިމަރިއާގެ މާމަ މަރުވެ އެކަމުގެ ހިތާމަ އާއި ހިތްދަތިތަކާ އެކުގައި ވެސް އޭނާ ވަނީ ގައުމަށްޓަކައި މެޗް ކުޅެދީފަ އެވެ.
ފުރަތަމަ ގޯލު ޖަހައި ދެވަނަ ގޯލު ޖެހުމަށް އެސިސްޓުކޮށްފައިވީ އިރު ޑިމަރިއާ އަށް ވަނީ ގޯލާ އެކު ކަރުނަތައް ހިފައްހައްޓައި ނުލެވިފަ އެވެ.
ރޭގައި ކުޅުނު ދެވަނަ މެޗު ޕެނަމާ އިން ވަނީ 2-1 ގެ ނަތީޖާއަކުން ކާމިޔާބުކޮށްފަ އެވެ.