ފްރާންސްގައި މާދަމާ ފަށާ ޔޫއެފާ ޔޫރޯ ފުޓްބޯޅަ މުބާރާތުގެ މެޗްތައް ޓީވީއެމާއި ޔެސް ޓީވީން ދައްކާ ގޮތަށް ހަމަޖައްސައިފި އެވެ.
މިކަމާ ގުޅޭ އެއްބަސްވުމުގައި ޕީއެސްއެމާއި މީޑިއާ ނެޓާ ދެމެދު ވަނީ ސޮއި ވެސް ކޮށްފަ އެވެ.
ޕީއެސްއެމްގެ މެނެޖިން ޑިރެކްޓަރު އިބްރާހިމް ހަލީހް ވިދާޅުވީ ޔޫރޯގެ މެޗްތައް ޓީވީއެމުން ދައްކާ ގޮތަށް ހަމަޖެހިގެން ދިޔައީ ވަރަށް ދިގު އިންތިޒާރަކަށް ފަހު ކަމަށެވެ.
ޕީއެސްއެމްގެ ޔެސް ޓީވީ އާއި ޓީވީއެމް މެދުވެރިކޮށް ޔޫރޯ ފުޓްބޯޅަ މުބާރާތް ބަލާލުމުގެ ފުރުޞަތު އާންމު ރައްޔިތުންނަށް ލިބިގެން ދާނެ ކަމަށް ހަލީލް ވިދާޅުވި އެވެ.
އޭނާ ވިދާޅުވީ މި ފަހަރު ޔޫރޯ ފުޓްބޯޅަ މުބާރާތް ޕީއެސްއެމްގެ ޗެނަލްތަކުން ގެނެސްދޭނީ ވީހާ ވެސް ގިނަ ރައްޔިތުންނާ ގުޅިގެން ކަމަށެވެ.
މިޑިއާ ނެޓްގެ ޗީފް އެކްޒެކެޓިވް ފައިނޭސް އަހުމަދު ނާޝިދު ވިދާޅުވީ ޔޫރޯ ފުޓްބޯޅަ މުބާރާތް އާއްމު ރައްޔިތުންނާ ހަމައަށް ގެނެސްދިނުމަށް ޕީއެސްއެމުން ކުރި މަސައްކަތް ފާހަގަކޮށް ލެވޭ ކަމަށެވެ.
ޕީއެސްއެމްގެ ޗެނަލްތަކުން ގެނެސްދޭ ޔޫރޯ މުބާރާތުގެ އެނަލިސްޓުންގެ ގޮތުގައި މި ފަހަރު ބައިވެރި ވާނީ ޝިމާޒް ޢަލީ، އަބްދުﷲ އަޒްމީން، ކޯޗް އަލީ ސުޒޭން، ސޮބާޙު މުޙައްމަދު އަދި މުޙައްމަދު ނަޒީހެވެ.
ޔޫރޯގެ މެޗްތައް ރާއްޖެ ޓީވީން ވެސް މި ފަހަރު ދައްކާނެ އެވެ.