އިރާޤުގެ ވެރިރަށް ބަގްދާދުގައި ދެފަހަރެއްގެ މަތިން ކާރެއްގައި ބޮން ހަރުކޮށް ގޮއްވާލައި 22 އަށް ވުރެ ގިނަ މީހުން މަރުވެ 70 އަށް ވުރެ ގިނަ ބަޔަކަށް އަނިޔާވެއްޖެއެވެ.
އެގައުމުގެ ސިފައިންގެ އޮފިޝަލަކާ ހަވާލާދީ ބޭރުގެ މީޑިޔާތައް ހަބަރު ފަތުރާފައިވާގޮތުން ފުރަތަމަ ގޮއްވުން ގޮއްވާފައިވަނީ ސިޓީގެ ހުޅަނގު އަވަށެއްގެ މަގެއްގައެވެ. ދެވަނަ ގޮއްވުން ހިނގާފައިވަނީ ސިޓީގެ އިރުމަތީ އަވަށެއްގެ ހަބަރުފަތުރާ މީޑިޔާއެއްގެ ކައިރިންނެވެ.
މިދިޔަ މޭއި މަހުގެ 17 ވަނަ ދުވަހުވެސް ވަނީ މިފަދަ ބޮމުގެ ހަމަލާތަކެއްގައި 70 އަށް ވުރެ ގިނަ މީހުން މަރާލާފައެވެ. އިސްލާމިކް ސްޓޭޓް ނަމަކަށް ކިޔާ ހަނގުރާމަ ޖަމާއަތް ވަނީ މިހާރު އާންމު ރައްޔިތުން އެމީހުންގެ އިންސާނީ އައްޑަނަތަކަކަށް ހަދާފައެވެ.
އިސްލާމިކް ސްޓޭޓާއި އިރާގުގެ ސިފައިންނާ ކުރާ ހަނގުރާމައިގައި މިހާރު ސިފައިން ވަނީ ފަލޫޖާ އެއްކޮށް ވަށާލާފައެވެ. 2014 ވަނަ އަހަރުގެ ޖެނުއަރީ މަހުން ފެށިގެން އައިއެސްގެ ބާރުގެ ދަށުގައި އޮންނަ ފަލޫޖާގެ ރައްޔިތުންނަށް މިރޯދަ މަހު ރޯދަ ހިފުމަށްވެސް ވަނީ ދަތިކަމަކަށްވެފައެވެ.