ޒުވާން ދެ ތަރިން ކަމަށްވާ ސުޝާންތު ރާޖް ޕުޓާއި ކިރިތީ ސެނަން ލީޑް ރޯލް ކުޅޭ ފިލްމް "ރާބްތާ" ގެ ޝޫޓިން ނިންމާލައިފި އެވެ.
މިދިޔަ މާޗް މަހުގައި ޝޫޓިން ފެށި ފިލްމުގެ ބޮޑު ބައި ޝޫޓްކޮށްފައިވާ ބުޑަޕެސްޓްގަ އެވެ. އެތަނުގެ ހިތްގައިމު މަންޒަރުތަކާ އެކު ފިލްމުގެ ޝޫޓިން މިހާރު ވަނީ އެއްކޮށް ނިންމާލައިފަ އެވެ.
ލޯބީގެ ހާދިސާތަކެއް ދައްކުވައިދޭ "ރާބްތާ" ގެ ޑައިރެކްޓަރަކީ "ކޮކްޓެއިލް" އާއި "ފައިންޑިން ފެނީ" ފަދަ ފިލްމުތައް ޕްރޮޑިއުސްކޮށްފައިވާ ދިނޭޝް ވިޖަން އެވެ.
މި ފިލްމުގެ ހާއްސަ ލަވައަކުން މަޝްހޫރު ބަތަލާ ދީޕިކާ ޕަދްކޯން ވެސް ފެނިގެން ދާނެ އެވެ. އެ ލަވަ ވެސް ޕުޑަޕެސްޓްގައި ނަގައި ނިންމައިފަ އެވެ.
"ރާބްތާ" އަކީ ސުޝާންތު އާއި ކިރިތީ އެކުގައި ކުޅޭ ފުރަތަމަ ފިލްމެވެ. މި ދެ މީހުން މިހާރު އުޅެނީ ލޯބީގެ ގޮތުން ގުޅިގެން ކަމަށް ވެސް އަޑު އަރާފައިވެ އެވެ.
ފިލްމުގެ ޝޫޓިން ފެށިތަނާހެން، ސުޝާންތާއި އޭނާގެ ޒަމާންވީ ލޯބިވެރިޔާ އަދި ޓީވީ ބަތަލާ އަންކިތާ ލޯކަންދޭގެ ގުޅުން ވެސް ވަނީ ނިމުމަކަަށް އައިފަ އެވެ.
"ރާބްތާ" ސިނަމާތަކަށް އަންނާނީ އަންނަ އަހަރުގެ ފެބްރުއަރީ މަހުގެ ތެރޭގަ އެވެ.