އދ. މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާން ޤާނޫނާ ޚިލާފަށް ރައީސް ޔާމީން ހައްޔަރުކުރުމަށް ސައްހަ ނޫން ކޯޓު އަމުރެއް ނެރުނު މައްސަލަ ސާބިތުވެ 17 އަހަރަށް ޖަލަށް ލުމަށް ކުރި ހުކުމަކީ ރަނގަޅު ހުކުމެއް ނޫން ކަމަށާއި ހައިކޯޓުގައި އެމައްސަލަ އިސްތިއުނާފު ކުރާނެކަމަށް ނިހާނުގެ ވަކީލު ހުސްނުއްސުއޫދު ވިދާޅުވެއްޖެ އެވެ.
ސޫއުދު ވިދާޅުވީ އެ އަމަރު ނެރުމަށް ނިހާން އިންކާރުކުރި ކަމަށް ކްރިމިނަލް ކޯޓުން ރިއާޔަތްކޮށްފައި ނުވާ ކަމަށެވެ.
ހުކުމް ކުރުމުގެ ކުރިން ސުއޫދު އިއްވާފައިވާ ހުލާސާ ބަޔާނުގައި ބުނެފައި ވަނީ ސައްހަ ނޫން ކޯޓު އަމުރެއް ނިހާން ނެރުނުކަން ދައުލަތަށް ސާބިތުކޮށް ދެވިފައި ނުވާ ކަމަށެވެ.
އަދި ކްރިމިނަލް ކޯޓުގެ ގާޒީ އަބްދުލް ބާރީ ޔޫސުފް ރޭގައި އިއްވާފައިވާ ހުކުމަކީ ރަނގަޅު ހުކުމެއް ނޫން ކަމަށް ސުއޫދު ވަނީ ތަކުރާރުކޮށްފަ އެވެ.
މާމިގިލީ ކޯޓުގެ އިސް މެޖިސްޓްރޭޓް ނިހާނުގެ އިތުރުން ކުރީގެ ޕީޖީ މުހުތާޒް މުހުސިންގެ މައްޗަށް ވެސް ވަނީ ދެ ދުވަސް ކުރިން މި މައްސަލައިގައި ކުށް ސާބިތުވެފައިވާ ކަމަށް ބުނެ 17 އަހަރަށް ޖަލަށް ލުމަށް ހުކުމްކޮށްފަ އެވެ.