ޔޫރޯ 2016 ގައި ގްރޫޕް ސީ ގެ މެޗުތައް މިރޭ ކުޅެފައިވާއިރު ޕޮލެންޑާއި ޖަރުމަނު ކުޅުނު މެޗުތައް ކާމިޔާބުކޮށްފިއެވެ.
މިގްރޫޕުގެ ފުރަތަމަ މެޗުގައި ޕޮލެންޑް އަދި ނޯތް އަޔަލޭންޑް ބައްދަލުކޮށް ޕޮލެންޑު ވަނީ އަޔަލޭންޑުގެ މައްޗަށް ކުރިހޯދާފައެވެ. މެޗުން ޕޮލެންޑު މޮޅު ވެފައިވަނީ 0-1 ގެ ނަތީޖާއަކުންނެވެ.
މެޗުގައި ފެނިގެންދިޔަ ހަމައެކަނި ގޯލު ފެނިގެން ގޮސްފައިވަނީ 51 ވަނަ މިނެޓުގައި އަރްކަދިއުސް މިލިކް ގެ ފަރާތުންނެވެ. ބެޔާން މިއުނިކްގެ ފޯވާޑް ރޮބާޓް ލެވެންޑޯސްކީގެ ފަރާތުން އެންމެ އެދެވޭ ކުޅުމެއް ޕޮލެންޑަށް ދެއްކިފައިނުވާކަން މިމެޗުން ފާހަގަ ކުރެވެއެވެ.
މިގުރޫޕުގެ ދެވަނަ މެޗުގައި ދުނިޔޭގެ ޗެމްޕިއަން ޖަރުމަނު ޔުކްރެއިންއާއި ދެކޮޅަށް ނިކުމެ 0-2 ގެ ނަތީޖާއަކުން މެޗު ވަނީ ކާމިޔާބުކޮށްފައެވެ.
މެޗުގެ ފުރަތަމަ ގޯލު 20 ވަނަ މިނެޓުގައި ޓޯނީ ކްރޫސް ލިބުނު ހިލޭ ޖެހުމެއް އޭރިއާ ތެރެއަށް ނަގައިދިނިމުން ބޮލުން ގޯލުގެ ތެރެއަށް ވައްދާލާފައިވަނީ ޑިފެންޑަރު މުސްތަފީއެވެ.
މެޗުގެ ކުރީކޮޅުގައި ޖަރުމަނުން ލީޑު ނެގިނަމަވެސް ގޯލަށް ފަހު މޮޅަށް ކުޅެފައިވަނީ ޔުކްރެއިންނެވެ. ގޯލާ އަމާޒަށް ނުރައްކާތެރި ތިން ހަމަލާ ކައިރިކައިރީގައި ފޮނުވާފައިވާއިރު ކީޕަރު ނޮޔާ ވަނީ ދެ ހަމަލާ މަތަކޮށްފައެވެ. އެންމެ ނުރައްކާތެރި ހަމަލާ ދިފާއުކޮށްފައިވަނީ ޑިފެންޑަރު ޖެރެމީ ބޯޓެންގް، ގޯލު ލައިނުގެ މަތިންނެވެ.
މަޗުގެ 90 މިނެޓު 0-1 ގެ ނަތީޖާ އިން ޖަރުމަނު ކުރީގައި އޮވެ ނިމިފައިވާއިރު 90 ވަނަ މިނެޓުގައި ޓީމުގެ ކެޕްޓަން ބަސްޓިއަން ޝްވައިންސްޓައިގާ ވަނީ އަރައި ޖަރުމަނުން ދިފާއު ކުރި ކޯނަރެއް ކައުންޓާ އެޓޭކުގައި ކުޅެ ގޯލު ޖަހާފައެވެ.
މިރޭ އިރާކޮޅު ކުޅުނު ގްރޫޕް ޑީ ގެ ފުރަތަމަ މެޗު ކްރޮއޭޝިޔާ ވަނީ ތުރުކީ ބަލިކޮށް 0-1 ގެ ނަތީޖާ އިން ކާމިޔާބުކޮށްފައެވެ. މެޗުން ފެނިގެންދިޔަ ހަމައެކަނި ގޯލު 41 ވަނަ މިނެޓުގައި ޖަހާފައިވަނީ ލޫކާ މޮޑްރިޗް އެވެ.