ހިޔާމަތްކޮށްފައިވާ ހިތަދޫ އީދިގަލި ކިޅި އާއި ކޯއްޓޭ ސަރަހައްދުގައި އީކޯ ޓޫރިޒަމަށް ހާއްސަކޮށްގެން ތަރައްގީވެފައިވާ ސަރަހައްދުގެ މެނޭޖްމަންޓް ޔުނިޓަށް ބޭނުންވާ ރޭންޖާޒް ހޯދަން އަނެއްކާ ވެސް އިއުލާންކޮށްފި އެވެ.
އެންވަޔަރަމަންޓް މިނިސްޓްރީން ނެރެފައިވާ އިއުލާނެއްގައި ބުނީ ބޭނުން ވަނީ ދެ ރޭންޖާސް ކަމަށެވެ.
އަދި މި މަގާމުތަކަށް ކުރިމަތިލާން ޝައުގުވެރިވާ ފަރާތްތަކަށް މި މަހުގެ 23 ވަނަ ދުވަހާ ހަމައަށް ފުރުސަހު ހުޅުވާލައިފައިވާ ކަމަށް ވެސް މިނިސްޓްރީން ބުންޏެވެ.
ވަޒީފާތަކަށް އެދި ސިޓީ ފޮނުވަން ޖެހެނީ ހިތަދޫގައި ހުންނަ އައްޑޫ ސިޓީ ކައުންސިލް އިދާރާއަށެވެ.
ރޭންޖާސްގެ މަގާމުތަކަށް ހޮވޭ ފަރާތްތަަކަށް ތައުލީމާއި ތަޖުރިބާ އަށް ބަލައި 10،000-13،000ރ. އާ ދެމެދުގެ މުސާރައެއް ލިބޭނެ އެވެ.
ރޭންޖާސްގެ ޒިންމާއަކީ ހިމާޔަތްކޮށްފައިވާ ސަރަހައްދު ބެލެހެއްޓުމެވެ.
ވޯލްޑް ބޭންކުގެ އެހީތެރިކަމާ އެކު ހިންގަމުންގެންދާ ކްލައިމޭޓް ޗޭންޖް އެޑެޕްޓޭޝަން ޕްރޮޖެކްޓް (ސީސީއޭޕީ) މަޝްރޫގެ ދަށުން ހިތަދޫގައި ތަރައްގީކޮށްފައިވާ ސަރަހައްދު މިހާރު ބެލެހެއްޓެމުން ނުދާތީ އެ ސަރަހައްދު ވަރަށް ބޮޑަށް ގޮނޑުވެ، ސަރަހައްދުގައި ހަދާފައިވާ ޖެޓީ ފަދަ ބައެއް ތަންތަނަށް ވަނީ އެކި ވަރުގެ ގެއްލުން ވެސް ލިބިފަ އެވެ.