ޔޫރޯ 2016 ގެ ގްރޫޕް ސްޓޭޖުގެ ފުރަތަމަ މެޗު ހުރިހާ ޓީމަކުންވެސް މިހާރު ކުޅެފައިވާއިރު ފަހު މެޗުގައި ޕޯޗުގަލް އާ އައިސްލޭންޑު ބައްދަލުކުރި މެޗު 1-1 ގެ ނަތީޖާއަކުން އެއްވަރުވެއްޖެ އެވެ.
ބޮޑު ތަފާތަކުން ޕޯޗުގަލް އައިސްލެންޑުގެ މައްޗަށް ކުރި ހޯދާނެ ކަމަށް ގިނަބަޔަކު ހީކޮށްގެން ތިބި ނަމަވެސް އައިސްލެންޑު ވަނީ ޕޯޗުގަލް ޓީމަށް، ހާއްސަކޮށް ކެޕްޓަން ރޮނާލްޑޯ އަށް އެއްވެސް ވަރަކަށް މެޗުގައި ބައިވެރިވުމެއް ނުދީ ހިފަހައްޓައިފަ އެވެ.
މެޗުގެ ފުރަތަމަ ގޯލު ލުއިސް ނާނީ މެޗުގެ 31 ވަނަ މިނެޓުގައި ކާމިޔާބުކޮށްފައިވާއިރު ދެވަނަ ހާފު ފެށިގެން މާ ގިނައިރުތަކެއް ނުވަނީސް އައިސްލެންޑުން ވަނީ ނަތީޖާ އެއްވަރުކޮށްފައެވެ.
50 ވަނަ މިނެޓުގައި ބިިޔަނަސަން އައިސްލެންޑަށް މެޗުގެ ނަތީޖާ އެއްވަރުކޮށްދީފައިވާއިރު މިއީ އެގައުމުގެ ކުޅުންތެރިޔަކު ދުނިޔޭގެ ފެންވަރުގެ މުބާރާތެއްގައި ޖެހި ފުރަތަމަ ގޯލެވެ.
ގޯލަށް ފަހު އައިސްލޭންޑުން ވަނީ ޕޯޗުގަލް އަށް އިތުރު ގޯލެއް ޖެހުމުގެ ފުރުސަތެއް ނުދިނުމަށް ވަރަށް ބޮޑަށް ޑިފެންސަށް އިސްކަންދީފައެވެ. މެޗު ނިމެން ކައިރިވެފައިވަނިކޮށް ރޮނާލްޑޯ އަށް 2 ހިލޭ ޖެހުން ލިބިފައިވާއިރު އޭނާއަށް ދެ ޖެހުން ވެސް ގޯލަކަށް ހަދާލެވިފައެއް ނުވެއެވެ.
މެޗަށް ފަހަށް ރޮނާލްޑޯ ވަނީ އައިސްލޭންޑުގެ ކުޅުމަށް ވަރަށް ބޮޑަށް ފާޑު ކިޔާފައެވެ. އޭނާ ބުނިގޮތުގައި އައިސްލޭންޑުގެ ޓީމުގައި ފުޓުބޯޅަ ކުޅުމުގެ އެއްވެސް ކަހަލަ ވިސްނުމެއް ނެތެވެ. އަދި މެޗުން އެއްވަރުވުމުން އެޓީމު ހީވަނީ ޔޫރޯގެ ތަށި ކާމިޔާބުކުރެވުނީ ކަމަށްވެސް އޭނާ ވަނީ ބުނެފައެވެ.
ރޮނާލްޑޯގެ އާދައިގެ ކުޅުމަށް ދުނިޔޭގެ އެކިކަންކޮޅުތަކުގެ މީހުން ވަނީ ޓުވިޓާގައި ވަރަށް ބޮޑަށް ފާޑު ކިޔައި ރައްދު ދީފައެވެ.