ޓީވީއެމުން ރޯދަ މަހު ގެނެސްދޭ އެންމެ ބޮޑު ޤުރުއާން މުބާރާތް "ދިވެހި ރާއްޖޭގެ އެންމެ އަލި ގަދަ ތަރި" ޕްރޮގްރާމްގައި މި އަހަރު އައްޑޫން ދެ މީހަކު ވާދަ ކުރެ އެވެ.
ގަދަ 12 އާ އެކު، މުބާރާތް ފެށި އިރު އިރު، އައްޑޫން މި ފަހަރު ވާދަ ކުރަނީ އެމްއެންޑީއެފްގައި ވަޒީފާ އަދާ ކުރާ މީދޫ ކޯޕްރަލް އަހުމަދު ނާއިދާއި މަރަދޫ އަލްގާރީ އަބްދުﷲ ތާލިބް އެެވެ.
މުބާރާތަށް ތާލިބް ހޮވުނީ ފުވައްމުލަކު އޮޑިޝަނުގައި ބައިވެރިވެގެންނެވެ. ނާއިދު ހޮވުނީ މާލޭ އޮޑިޝަނުންނެވެ.
ޓީވީއެމުން އެންމެ ފުރަތަމަ "ދިވެހި ރާއްޖޭގެ އެންމެ އަލިގަދަ ތަރި" ޕްރޮގްރާމް ބޭއްވީ 2013 ގަ އެވެ. އެ ފަހަރު މުބާރާތް ކާމިޔާބު ކުރީ އައްޑޫން މުބާރާތުގައި ވާދަ ކުރަން ހުސައިން ޒާހިރެވެ.
އޭގެ ފަހުން ބާއްވަމުން އައި މި މުބާރާތުގައި ކޮންމެ އަހަރަކު ވެސް އައްޑު އަށް ނިސްބަތްވާ މީހުން އަންނަނީ ވާދަ ކުރަމުންނެވެ.
ބައި މިލިއަން ރުފިޔާގެ ފައިސާގެ އިނާމެއް ހުށައެޅިފައިވާ "ދިވެހި ރާއްޖޭގެ އެންމެ އަލި ގަދަ ތަރި" ޕްރޮގްރާމަކީ ޤުރުއާން ކިޔެވުމުގެ ހުނަރާއި، ޤުރާއާނާމެދު މުޖުތަމަޢުގައި އޮންނަ ޤަދަރު މަތިކޮށް، ޤުރުއާނާމެދު ޢާންމުންގެ ހިތްތަކުގައި ލޯބި ޖެއްސުމުގެ ގޮތުން ގެނެސްދޭ ޕްރޮގްރާމެކެވެ.
މި އަހަރުގެ ޕްރޮގްރާމް ދައްކަން ފަށާފައި ވަނީ މި މަހުގެ އަށް ވަނަ ދުވަހުގެ ރޭގަ އެވެ.
މުބާރާތުގެ ގަދަ 12 ބައިވެރިންގެ ހުނަރު ތަރައްޤީ ކުރުމުގެ އެއްބަސްވުމެއްގައި ޕީއެސްއެމުން ވަނީ ބައިވެރިންނާ އެކު އެއްބަސްވުން ހަދާފަ އެެވެ.