ޔޫރޯ 2016 ގައި ގްރޫޕް ބީ ގައި ހިމެނޭ އިނގިރޭސި ވިލާތާއި އަވަށްޓެރި ވޭލްސް ބައްދަލުކުރި މެޗު ފަހަތުން އަރައި އިނގިރޭސިން ކާމިޔާބުކޮށްފިއެވެ. އިނގިރޭސިވިލާތް މެޗު ކާމިޔާބުކޮށްފައިވަނީ 1-2 ގެ ނަތީޖާއަކުންނެވެ.
މެޗުގެ ފުރަތަމަ ގޯލު ވޭލްސްއަށް ކާމިޔާބުކޮށްދީފައިވަނީ ކުރީ މެޗުގައިވެސް ލަނޑުޖެހި ރިއަލްމެޑްރިޑްގެ ގެރެތް ބޭލްއެވެ. ކުރީ މެޗާ އެއްގޮތަށް މިރޭވެސް ބޭލް ގޯލު ޖަހާފައިވަނީ ގޯލު ކުރިމަތިން ލިބުނު ހިލޭ ޖެހުމަކުން 42 ވަނަ މިނެޓުގައެވެ.
ރަޝިޔާއާ ދެކޮޅަށްވެސް ފެނުނު އިނގިރޭސި ޓީމު މިރޭވެސް ފުރަތަމަ އެގާރައިން ފެނިފައިވާއިރު ފުރަތަމަ ހާފުގައި ރަނގަޅު ކުޅުމެއް ފެނިފައެއް ނުވެއެވެ.
ނަމަވެސް ދެވަނަ ހާފުގައި ރަހީމް ސްޓާލިންގް އާއި ހެރީ ކޭން ގެ ބަދަލުގައި ޑެނިއަލް ސްޓަރިޖް އަދި ޖޭމީ ވާޑީ ކުޅެން ނިކުންމިފަހުން އިނގިރޭސިން ވަނީ ފުރަތަމަ ހާފާ އަޅާ ބަލާއިރު ބޮޑުތަން ރަނގަޅުކޮށްފައެވެ.
ނަތީޖާއެއްގެ ގޮތުން މާގިނައިރު ތަކެއް ނުވެ ވާޑީ ވަނީ ގޯލު ޖަހައި އިންގްލެންޑަށް މެޗުގެ ނަތީޖާ ހަމަހަމަ ކޮށްދީފައެވެ. ގޯލަށްފަހުވެސް ގިނަވަގުތު ބޯޅަ ހިފަހައްޓައިގެން ކުޅުނީ އިންގްލެންޑުންނެވެ.
މެޗުގެ 90 މިނެޓު ހަމަވީއިރު ދެޓީމު ވަނީ އެއްވަރުވެފައެވެ. އިންޖަރީ ވަގުތުގެ ގޮތުގައި ރެފްރީ ދައްކާފައިވާ 4 މިނެޓުން ދެވަނަ މިނެޓުގައި ޑެނިއަލް ސްޓަރިޖް ވަނީ އިނގްލޭންޑަށް ފުރަތަމަ ފަހަރަށް މެޗު ލީޑު ނަގާދީފައެވެ.
އިނގިރޭސިން ބަލިކުރެވުނުނަމަ ވޭލްސް ޓީމަށް 3 މިލިއަން ޕައުންޑު އެގައުމުން ވަނީ ހުށައަޅާފައެވެ.
މިމެޗުގައި މެންޗެސްޓާ ޔުނައިޓެޑުގެ 18 އަހަރުގެ ޒުވާން ތަރި، މާކަސް ރަޝްފޯޑް ވަނީ ޔޫރޯގައި މިހާތަނަށް ކުޅުނު އެންމެ ޒުވާން ކުޅުންތެރިޔާގެ ރިކޯޑުވެސް ހަދާފައެވެ.