ޔޫރޯ 2016 ގައި ޕޯޗުގަލް ކުޅުނު ގްރޫޕް ސްޓޭޖުގެ ދެވަނަ މެޗުން ވެސް އެއްވަރުވެއްޖެ އެވެ.
ފުރަތަމަ މެޗު އައިސްލޭންޑާއި ދެކޮޅަށް ކުޅުނު މެޗު 1-1 އިން އެއްވަރުވެގެން ނިމުނުއިރު ދެވަނަ މެޗު އޮސްޓްރިޔާ އާ ދެކޮޅަށް ކުޅެ ނިމިފައި ވަނީ ލަނޑެއް ނުޖެހި އެވެ.
23 ޝޮޓު މެޗުގައި ޕޯޗުގަލް އިން ހަދާފައިވާއިރު ކެޕްޓަން ކްރިސްޓިއާނޯ ރޮނާލްޑޯ ވަނީ އޭގެ ތެރެއިން 20 ޝޮޓު ގޯލަށް ފޮނުވާލާފައެވެ.
ރޭގެ މެޗުގައި ޕޯޗުގަލް އަށް ލިބުނު ޕެނަލްޓީއެއްވެސް ރޮނާލްޑޯ އަށް ވަނީ ކާމިޔާބުކުރެވޭ ގޮތެއް ނުވެފައެވެ.
އޭނާގެ ކެރިއަރުގައި މިހާތަނަށް ކުޅުނު އެންމެ ރުޅި އިހުސާސް ކުރެވުނު އެއް މެޗަށް ރޭގެ މެޗު ވެފައިވީ ނަމަވެސް މެޗަށް ފަހު ދަނޑަށް އޭނާ އެކު ސެލްފީއެއް ނެގުމަށް އެރި ސަޕޯޓަރަކު ސެކިއުރިޓީ އިން ހުއްޓުވަން މަސައްކަތް ކުރުމުންވެސް ރޮނާލްޑޯ ވަނީ އޭނާ އެކު ސެލްފީ ނަގައިފައެވެ.
ގްރޫޕް ސްޓޭޖުގެ ފަހު މެޗުގައި ހަންގޭރީ އާ ދެކޮޅަށް ޕޯޗުގަލް ކުޅޭ މެޗަކީ ދެވަނަ ބުރަށް ދިއުމަށް މަޖުބޫރު މެޗަކަށް މިހާރުވަނީ ވެފައެވެ.