ޒަމާނުއްސުރެ ރައީސް މައުމޫނަށް ވަފާތެރި ކަމާއެކު ހިދުމަތްކޮށްފައިވާ ބޭފުޅުންނާއެކު ކުއްލި ބައްދަލުވުމެއް ޕީޕީއެމް އޮފީހުގައި ބާއްވަމުން ގެންދަވާކަމަށް 'އައްޑޫލައިވް' އަށް މައުލޫމާތު ލިބިއްޖެއެވެ.
މިބައްދަލުވުމުގައި ބައިވެރިވެފައިވަނީ ކުރީގެ ހޯމް މިނިސްޓަރު އުމަރު ނަސީރުއާއި، ހަމްދޫން ހަމީދު، ސީނާ ޒާހިރުގެ އިތުރުން ކުރީގެ ޖެންޑަ މިނިސްޓަރު އަނީސާ އަހުމަދާއި ފާރިޝް މައުމޫން ކަމަށް މައުލޫމާތު ލިބިފައިވެއެވެ.
އިއްޔެ މަޖިލީހުން ފާސްކޮށްފައިވާ ބިޑް އަކާ ނުލާ ރަށްތައް ކުއްޔަށް ދޫކުރެވޭ ބިލަށް ރައީސް ޔާމީނާ ދެކޮޅަށް ވޯޓު ދިނުމަށް ރައީސް މައުމޫން އަންގާފައިވާއިރު އެމަނިކުފާނުގެ އެންގެވުމަށް ތަބާނުވެ ގިނަ ޕީޕީއެމް ގެ މެމްބަރުން ވަނީ ބިލް ފާސް ކުރުމަށް ވޯޓު ދީފައެވެ.
ބިލް ފާސް ކުރި ފަހުން ރައީސް ޔާމީނާ އެމަނިކުފާނުންގެ ބޭބެ ކުރީގެ ރައީސް މައުމޫން އަބްދުލް ގައްޔޫމާއި ދެމެދު ދެބަސްވުންތަކެއް އުފެދި މައުމޫނާއި އެއްކޮޅަށް ތިބި ބައެއް ސަރުކާރުގެ މުވައްޒިފުން ވަނީ މަގާމުންވެސް ވަކިކޮށްފައެވެ.
އަދި ޕީޕީއެމްގެ ނައިބު ރައީސްގެ ޕާޓީގެ ހުރިހާ ބާރުތަކެއް ޕާޓީގެ ރައީސް މައުމޫން ވަނީ މިކަމާއި ގުޅިގެން އިއްޔެގެ ވަގުތެއްގައި ނަންގަވާފައެވެ.
ކަންތައް މިގޮތަށް ދިމާވެ މިއަދު ޕީޕީއެމް ގެ ކައުންސިލް މެމްބަރުންނާއި ރައީސް ޔާމިންވެސް ވަނީ ބައްދަލުކުރައްވާފައެވެ.