ގަލޮޅު ދަނޑުގެ ވިނަގަނޑު ހަލާކުވުމާ ގުޅިގެން އެފްއޭ ކަޕު މިދިޔަ އަހަރު ނުބާއްވައި މުބާރާތް މެދު ކަނޑާލުމަށްފަހު އެފްއޭއެމް އިން މިއަހަރު އެމުބާރާތް ބޭއްވުމަށް ނިންމައިފި އެވެ.
އަންނަ އޮގަސްޓު މަހުގެ ދެވަނަ ދުވަހު ފެށުމަށް ހަމަޖެހިފައިވާ މުބާރާތުގައި ބައިވެރިވުމަށް ބޭނުންވާ ކުލަބުތަކުން މިމަހުގެ 14 ވަނަ ދުވަހުގެ ކުރިން އެފްއޭއެމް އަށް ފޯމު ހުށައެޅުމަށް އެ އެސޯސިއޭޝަނުން ވަނީ އަންގާފައެވެ.
ގަލޮޅު ދަނޑުގައި މިދިޔަ އަހަރު ބޭއްވި މިނިވަން ފަންސާސް ކުޅިވަރު ހަރަކާތްތަކާ ގުޅިގެން ގަލޮޅު ދަނޑުގެ ވިނަގަނޑު ހަލާކުވެ އެފްއޭ ކަޕް ނުބޭއްވުނު އިރު އެންމެ ފަހުން އެ މުބާރާތް ބާއްވާފައި ވަނީ 2014 ވަނަ އަހަރު އެވެ.
އެންމެ ފަހުން 2014 ވަނަ އަހަރު ބޭއްވި އެފްއޭ ކަޕްގެ ޗެމްޕިއަން ކަން މާޒިޔާ ހޯދާފައި ވަނީ އެ މުބާރާތް 11 ފަހަރު ކާމިޔާބު ކޮށްފައިވާ ނިއު ރޭޑިއަންޓް ސްޕޯޓްސް ކުލަބު ބަލިކޮށްފަ އެވެ. ނިއު އަކީ 1998 ވަނަ އަހަރާއި 2007 ވަނަ އަހަރު އެފްއޭ ކަޕް މިލްކް ވެސް ކޮށްފައިވާ ޓީމެކެވެ.