ކުރީގެ އުނގޫފާރު ދާއިރާގެ މެމްބަރު ދީނީ އިލްމުވެރިޔާ ޑރ.އަފްރާޝީމް އަލީގެ ގާތިލުކަމަށް ކަނޑައަޅައި ހ. ލޮބީ ހުސެން ހުމާމް އަހުމަދުގެ މައްޗަށް ކުށް ސާބިތުވެ މަރަށް ހުކުމްކޮށް އެ ހުކުމް ތަންފީޒު ކުރުމަށް ސަރުކާރުން މަސައްކަތް ކުރަމުން ދަނިކޮށް އޮކްސްފޮޑް ޔުނިވާސިޓީގެ އިސްލާމް ދީންގެ ލެކްޗަރަރ ތޯރިގް ރަމަޟާން ރައީސް ޔާމީނަށް ފޮނުވި ސިޓީއަށް ކުރީގެ އިސްލާމިކް މިނިސްޓަރު ޝެއިޚް ޝަހީމް ރައްދު ދެއްވައިފި އެވެ.
ތޯރިގް ރަމަޟާންގެ ސިޓީއަށް ޝެއިޚް ޝަހީމް ރައްދުދީ ބުނެފައިވަނީ ބިދޭސީން ރާއްޖެ ބަދުނާމު ކުރާތީ ހިތާމަ ކުރާކަމަށެވެ. އަދި ރާއްޖޭގައި މަރުގެ އަދަބު ތަންފީޒު ކުރުމާބެހޭ ގާނޫނު ތޯރިގް ރަމަޟާނަށް އެނގިފައިނުވާކަން ފާހަގަ ކުރެވޭ ކަމަށެވެ.
ގިޞާޞްގެ ހުކުމަކީ އިސްލާމީ ޝަރީއަތުގައި އޮތް ހުކުމަކަށްވެފައި ގިސާސްގެ މައްސަލައެއް ރާއްޖޭގެ ޝަރުއީ ތިން މަރުހަލާ ނިމިގެން ނޫން ގޮތަކަށް ތަންފީޒު ނުކުރާނެ ކަމަށްވެސް ޝަހީމް ބުނެފައިވެއެވެ.
އޮކްސްފޮޑް ޔުނިވާސިޓީގެ ލެކްޗަރަރު ތޯރިގް ރަމަޟާން ރާއްޖޭގެ ރައީސުލް ޖުމުހޫރިއްޔާ އަބްދުﷲ ޔާމީނަށް ފޮނުވި ސިޓީ ސޯޝަލް މީޑިޔާގައި އާއްމުވެފައިވާއިރު އޭގައި ގިސާސް ހިފުމަށް ފުށޫއަރާ ގިނަ މައްސަލަތަކެއް ހުމާމްގެ މައްސަލައިގައި ވާކަން ފާހަގަ ކުރެވޭތީ އެމައްސަލަތައް ބަލާނުލައި ގިސާސްގެ ހުކުމް ކަނޑނޭޅުމަށް އޭނާ ވަނީ ރައީސް ޔާމީނަށް ނަޞޭހަތްތެރިވެފައެވެ.
ނަމަވެސް ރައީސް ޔާމީން އެންމެ ފަހުން ރައްޔިތުންނާ ބައްދަލުކޮށް ވާހަކަ ދެއްކެވިއިރު ބޭރުގެ ޕްރެޝަރު އޮތް ނަމަވެސް މަރުގެ ހުކުމް ކޮށްފައިވާ ކުށްވެރިންގެ މައްޗަށް މަރުގެ ހުކުމް ތަންފީޒު ކުރައްވާނޭ ކަމަށް ބުނެފައިވެއެވެ.
މަރުގެ ހުކުމް ތަންފީޒު ކުރުމާ ދެކޮޅުކަމަށް ބުނެ ދިވެހި ރާއްޖޭގެ ފޮރިން މިނިސްޓަރު ކަމުން ރައީސް ޔާމީނަށް ބޮޑުބޭބެ ކިޔާ ދުންޔާ މައުމޫން ވަނީ މަގާމުން އިސްތިއުފާވެސް ދެއްވާފައެވެ.