އެމެރިކާގައި ކަޅު ނަސްލުގެ މީހަކު އަނިޔާވެރިކަމާއެކު މަރާލުމުގެ ސަބަބުން މުޒާހަރާ ކުރުން ގިނަވެ، މުޒާހަރާ ހުއްޓުވުމަށް ދިޔަ ފުލުހުންގެ ގަޔަށް ބަޑި ޖަހައި 5 ފުލުހަކު މަރާލައި، 11 މީހުން ޒަޚަމް ކޮށްލައިފިއެވެ.
އެމެރިކާގެ ޑަލާސް ގައި ހިނގާދިޔަ މި ހާދިސާގައި ފުލުހުންގެ ގަޔަށް ބަޑި ޖަހާފައިވަނީ ސަރަހައްދު ކައިރީ ތިބި އިމާރާތެއްގައި ތިބި ސްނައިޕަރުންނެވެ.
ހަމަލާ ދީފައިވަނީ ކިތައް ސްނައިޕަރުން ކަމަށް ހޯދިފައިނުވާއިރު ސީއެންއެން އިން ރިޕޯޓުކޮށްފައިވަނީ މިއީ 9/11 އަށް ފަހު އެގައުމުގެ ފުލުހުންނަށް ދީފައިވާ އެންމެ ނުރައްކާތެރި ހަމަލާކަމަށެވެ.
މަރުވެފައިވަނީ ކޮން ބައެއްކަން އަދި އިއުލާންކޮށްފައި ނުވިނަމަވެސް ޑަލާސްގެ ފުލުސް އޮފީހުން ވަނީ 5 ފުލުސް އޮފިސަރަކު މަރާލާފައިވާކަމަށާއި އިތުރު 11 ފުލުހުންނަށް މިހާރު ފަރުވާ ދެމުންދާކަން ކަށަވަރުކޮށްދީފައެވެ.
އަދި ފުލުހުން ރޭގައި ވެސް ނުކުމެފައިވަނީ ގައުމަށްޓަކައި ފުރާނަ ދިނުމަށް ތައްޔާރަށް ކަމަށާއި ފުލުހުންނާމެދު ފަޚުރުވެރިވާކަމަށްވެސް އެސްޓޭޝަނުން ކުރި ޓުވީޓެއްގައިވެއެވެ.
ހަމަލާތަކާއި ގުޅިގެން އެމެރިކާގެ ކުރީގެ ކޮންގްރެސްގެ މެމްބަރަކު ބުނެފައިވަނީ މިއީ ގައުމުގެ ތެރޭގައި ހަނގުރާމަ ފެށުނީ ކަމަށާއި ރައީސް ބަރަކް އޮބާމާއަށް 'އަސްލު އެމެރިކާ' މީހުން އަންނާނެ ކަމަށް ބުނެ އިންޒާރުދީފައެވެ.