ޕީޕީއެމް ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރު ގެ ސުލޫކީ މައްސަލައެއް ބަލާކަން އެއްވެސް ގޮތަކަށް ޕާޓީގެ ފަރާތުން އެނގިފައި ނުވާ ކަމަށް ފާރިސް ވިދާޅުވެއްޖެ އެވެ.
ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނލުން ފާރިސް މައުމޫން ޕީޕީއެމްގެ ޑެޕިއުޓީ ސެކްޓްރީ ޖެނެރަލްއަށް، ސޯޝަލް މީޑިޔާގައި އެބޭފުޅާގެ ސުލޫކީ މައްސަލައެއް ޕާޓީ އިން ބަލަމުންދާ ޚަބަރު އިވިފައިވާ ކަމަށާއި އޭގެ އެއްވެސް މައުލޫމާތެއް ޕާޓީގެ އެއްވެސް ރަސްމީ ހައިސިއްޔަތަކުން އަންގާފައި ނުވާކަމަށް ބަޔާންކޮށް ސިޓީއެއް ފޮނުވާފައިވެ އެވެ.
އަދި މިިފަދަ ސުލުކީ މައްސަލައެއް ބަލާކަމަށް ވާނަމަ ޕާޓީގެ އަސާސީ ގަވާއިދާއި، ޕާޓީގެ ސުލޫކީ ކޮމެޓީގެ ހިންގާ ގަވާއިދާއި، ޕާޓީގެ ސުލޫކީ ފިޔަވަޅު އެޅުމާ ބެލުމާ ބެހޭ ގަވާއިދު ބުނާ އެއްވެސް އިއުތިރާޒެއް ފުރިހަމަ ކޮށްފައި ނުވާ ކަމަށެވެ.
ފާރިސް މައުމޫން ސޮއި ކުރައްވައި ޕީޕީއެމްގެ ޑެޕިއުޓީ ސެކެޓްރީ ޖެނެރަލް އަބްދުލް އަލީމް އާދަމަށް ފޮނުވާފައިވާ ސިޓީގައި އެބޭފުޅާގެ މިފަދަ ސުލޫކީ އެއްވެސް މައްސަލައެއް ބަލަމުންދާ ކަމުގައި ވާނަމަ އެކަން އެ ބޭފުޅާއަށް ވީހާވެސް އަވަސް މުއްދަތެއްގައި އަންގައި އިއުލާންކޮށް ޕާޓީގެ ގަވާއިދާއި ޚިލާފު ނުވުމަށް އެދިފައިވެ އެވެ.
ދިއްގަރު ދާއިރާގެ މެމްބަރު ފާރިސް މައުމޫންގެ ސުލޫކީ މައްސަލައެއް ޕާޓީގެ ފަރާތުން ބަލަން ފަށާފައި ވަނީ ރައްޔިތުންގެ މަޖިލީހަށް ހުށައެޅި ބިޑަކާ ނުލާ ރަށްތައް ދޫކުރެވޭނެ ގޮތަށް އިސްލާހުކުރި ބިލާ އެއްކޮޅަށް ވޯޓު ދިނުމަށް ޕީޕީއެމްގެ ޕާލަމެންޓްރީ ގްރޫޕުން ނެރުނު 3 ލައިން ވިޕާ ޚިލާފުވެ އެބިލާ ދެކޮޅަށް ވޯޓު ދިނުމުންނެވެ.
މައްސަލަ ބަލައި ޕީޕީއެމްގެ ސުލޫކީ މައްސަލަ ބަލާ ކޮމެޓީން ފާރިސް މައުމޫން ވަނީ ޕީޕީއެމުން މިހާރު ވަކިކޮށްފަ އެވެ.