ސާއިދަށް އަނެއްކާ ވެސް ރަން މެޑެއްޔެއް

ދިވެހި ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު މިއަދު އިންޑިޔާގައި ބާއްވާ ގްރޭންޑް ޕްރީ އެތުލެޓިކްސް މުބާރާތުން ރަން މެޑަލް ހޯދައިފި އެވެ.

މުބާރާތުގެ 100 މީޓަރު ދުވުމުން ސާއިދު ރަން މެޑަލް ގެނެސްފައި ވަނީ 10:37 ސިކުންތުގައި ރޭސް ނިންމާލައިގެންނެވެ. ރާއްޖޭގެ 100 މީޓަރު ދުވުމުން ގައުމީ ރިކޯޑުވެސް ވަނީ ސާއިދު އަތުގައެވެ. ރާއްޖޭގެ ގައުމީ ރިކޯޑަކީ 10:33 ސިކުންތެވެ.

އޮލިމްޕިކްސް އަށް ކޮލިފައިވާ އެތްލީޓުން ކަނޑައަޅާ މިމުބާރާތުގައި އިންޑިޔާ އެއްވެސް އެތްލީޓަކު ކޮލިފައިވެފައެއް ނުވެއެވެ. 10:16 ސިކުންތަށްވުރެ އަވަހަށް ރޭސް ނިންމާލައިގެން އޮލިމްޕިކްސް އަށް ކޮލިފައިވާއިރު އެގައުމުގެ އެއްވެސް ދުވުންތެރިޔަކަށް ކަނޑައެޅިފައިވާ ވަގުތުގައި ރޭސް ނިންމާލެވިފައެއް ނުވެއެވެ.

ރާއްޖޭގެ ދުވުންތެރިން މިފަހަރުގެ އޮލިމްޕިކްސްގައި ބައިވެރިވެފައިވަނީ އޮލިމްޕިކްސްއަށް ކޮލިފައި ނުވާ ގައުމުތަކަށްދޭ ޙާއްސަ ޖާގައިގެ ތެރެއިންނެވެ.

ގައުމީ ދުވުންތެރިން މިހާރު ބެންގަލޫރުގައި ކުރިއަށްދާ ގްރޭންޑް ޕްރީ މުބާރާތުގައި މާދަމާވެސް ވާދަކުރާނެއެވެ. އޮލިމްޕިކްސްގައި ބައިވެރިވާ ސާއިދު އަދި އަފާ 200 މީޓަރުގައި ވާދަ ކުރާއިރު ގައުމީ ރިލޭގައި ބައިވެރިވާ ދުވުންތެރިންވެސް މާދަމާ ވާދަކުރާނެއެވެ.