ޔޫރޯ 2016 ގައި ފްރާންސްގެ އަމިއްލަ ދަނޑުގައި ބަލިކޮށް ޕޯޗުގަލް ދުނިޔެ ސިއްސުވާލައިފި އެވެ.
މެޗުގެ ބޮޑުބައި ކެޕްޓަން ރޮނާލްޑޯއާ ނުލާ ކުޅުނު ޕޯޗުގަލް މުބާރާތުގެ ހޯސްޓު ފްރާންސް ބަލިކޮށްފައިވަނީ އިތުރު ވަގުތުގައި ޖެހި ގޯލަކާއެކު 0-1 އިންނެވެ.
ގްރޫޕް ސްޓޭޖް ގްރޫޕުގެ ތިންވަނައިގައި އޮވެ ނިންމާލި ޕޯޗުގަލް ޓީމު ފައިނަލަށް ނިކުތްއިރު ގިނަ މީހުން ތިބީ ފްރާންސް ކޮޅަށެވެ.
މުބާރާތުގައި ކުޅުނު 7 މެޗުގެ ތެރެއިން 6 މެޗުގައި 90 މިނެޓު ތެރޭ މޮޅެއް ނުލިބި ތަށި ކާމިޔާބުކުރި ފުރަތަމަ ޓީމަށް ޕޯޗުގަލް ވަނީ މިހާރުވެފައެވެ.
މެޗުގެ ވަރަށް ކުރީ ކޮޅުގައި އަނިޔާގެ ސަބަބުން ޓީމުގެ ކެޕްޓަން ކްރިސްޓިއާނޯ ބަދަލުކޮށްފައިވާއިރު ގިނަބަޔަކު ވަނީ އެބަދަލަށްފަހު ފްރާންސަށް ތަށި ޔަގީން ކުރެވުނީ ކަމުގައި ނިންމައިގެންނެވެ.
ނަމަވެސް ޕޯޗުގަލް ޓީމުން ވަނީ ހިތްވަރު ދޫނުކޮށް ފްރާންސަށް ގޯލެއް ޖެހުނަ ނުދީ ހިފަހައްޓާފައެވެ.
90 މިނެޓު ހަމަވާން ކައިރިވެފައިވަނިކޮށް މެޗުގައި ލިބުނު އެންމެ ބޮޑު ފުރުސަތު ފްރާންސުގެ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ގިޖްނެކް އަށް ލިބިފައިވާއިރު އޭނާ ފޮނުވި ބޯޅަ ދިފާއު ކޮށްފައިވަނީ ގޯލުގެ ދަގަނޑެވެ.
މެޗުގެ 90 މިނެޓު ލަނޑެއް ނުޖެހި އެއްވަރުވެ އިތުރު ވަގުތުގެ 15 މިނެޓުގެ ދެހާފު ކުޅެ އިތުރު ވަގުތުގައިވެސް ގިނައިން ބޯޅަ ހިފަހައްޓައިގެން ކުޅެފައިވަނީ ފްރާންސެވެ.
މެޗުގެ 109 ވަނަ މިނެޓުގައި ޕޯޗުގަލް އިން ބަދަލު ކުޅުންތެރިޔެއްގެ ގޮތުގައި ކުޅެން ނިކުތް އެޑާ ވަނީ ޕެނަލްޓީ އޭރިޔާ ބޭރުން ގޯލު ޖަހާފައެވެ.
އޭނާގެ ގޯލާއެކު ޕޯޗުގަލް ތަށި ކާމިޔާބުކޮށްފައިވާއިރު މިއީ އެޓީމު ޔޫރޯ ފައިނަލުގައި ކުޅުނު ދެވަނަ ފަހަރެވެ. 2004 ވަނަ އަހަރު ގްރީސް އާ ދެކޮޅަށް ކުޅެ ގިނަ ބަޔަކު ހީކުރި ގޮތާ ޚިލާފަށް ޕޯޗުގަލް ބަލިވިއރު 12 އަހަރު ފަހުން ގިނަ ބަޔަކު ހީކުރި ގޮތާ ޚިލާފަށް އެމީހުން ވަނީ ތަށި ނަގާފައެވެ.
މިއީ ޕޯޗުގަލް ފުޓުބޯޅަ ޓީމަށް ލިބުނު ބޮޑު ފުރަތަމަ ޓްރޮފީއެވެ.